കൊച്ചി: നഗരസഭയുടെ ആധുനിക ബസ് ഷെല്ട്ടറിന്റെ ഉദ്ഘാടനം ഡെപ്യൂട്ടി മേയര് ബി.ഭദ്ര നിര്വഹിച്ചു. എം.ജി.റോഡില് മഹാരാജാസ് കോളേജ് ഗ്രൗണ്ടിന് സമീപം എല്ഐസി ഓഫീസിന് എതിര്വശത്താണ് ആധുനിക ബസ് ഷെല്ട്ടര് നിര്മിച്ചിട്ടുള്ളത്.
ബസ് വരുന്നത് വരെയുള്ള കാത്തിരിപ്പിന്റെ മുഷിപ്പ് ഒഴിവാക്കാന് കൂട്ടിന് ഇംഗ്ലീഷ്, മലയാളം പത്രങ്ങളും, ഇമ്പമാര്ന്ന സംഗീതവും യാത്രക്കാര്ക്ക് മൊബെയില് ചാര്ജ് ചെയ്യുന്നതിനുള്ള സൗകര്യവും മനോഹരമായ ഇരിപ്പിടങ്ങളുമാണ് ഇവിടെ തയ്യാറാക്കിയിരിക്കുന്നത്.
കൊച്ചി ആസ്ഥാനമായ ഐശ്വര്യ അഡ്വര്ട്ടൈസിംഗ് ഇന്ഡസ്ട്രീസാണ് ഷെല്ട്ടര് രൂപകല്പ്പന ചെയ്ത് നിര്മ്മിച്ചിരിക്കുന്നത്. നഗരത്തില് വിവിധ സ്ഥലങ്ങളില് ഇത്തരത്തിലുള്ള ബസ് ഷെല്ട്ടറുകള് നിര്മിക്കുമെന്ന് ഐശ്വര്യ അഡ്വര്ട്ടൈസിംഗ് ഇന്ഡസ്ട്രീസ് മാനേജിംഗ് ഡയറക്ടര് കെ.വിജയകുമാര് പറഞ്ഞു.
കൗണ്സിലര് എം.ബി.മുരളീധരന് അദ്ധ്യക്ഷത വഹിച്ച ചടങ്ങില് കൗണ്സില് എ.ആര്.പത്മദാസ്, മുന് കൗണ്സിലര് കെ.വി.പി.കൃഷ്ണകുമാര്, കുമ്പളം രവി, സലാം പുല്ലേപ്പടി, എസ്.കെ.ഗോപാലകൃഷ്ണന്, പി.പി.രാജീവ്, ദീപ്തി വിജയകുമാര്, വേണു കറുകപ്പള്ളി, സ്റ്റാന്ലി പത്ത്യാല, കെ.ജി.റോയി, എം.ബി.ഷാജന് തുടങ്ങിയവര് പങ്കെടുത്തു.
