കൊച്ചി: ജില്ലാ ഭരണകൂടം കുട്ടികളുടെ പാര്ക്കില് ആരംഭിച്ച അവധിക്കാല പ്രത്യേക വിനോദ പരിപാടികളുടെ ഭാഗമായി ജില്ലാ ശിശുക്ഷേമസമിതി ഹാര്ട്ട്ലൈറ്റ് അസോസിയേഷനുമായി ചേര്ന്ന് എറണാകുളം കുട്ടികളുടെ തിയേറ്ററില് സംഘടിപ്പിക്കുന്ന കുട്ടികളുടെ രാജ്യാന്തര ചലചിത്രമേളയ്ക്ക് തുടക്കമായി. ഹൈബി ഈഡന് എം.എല്.എ ചലചിത്ര മേളയ്ക്ക് തിരിതെളിച്ചു. ഇനിയുള്ള രണ്ടുമാസക്കാലം കുട്ടികള്ക്ക് ചിരിച്ചും ചിന്തിച്ചും അവധിക്കാലം ആസ്വദിക്കാം.
ജില്ലയില് കുട്ടികള്ക്ക് വേണ്ടിയുള്ള കളിസ്ഥലങ്ങള് കുറവായതിനാല് ഇത്തരം കൂട്ടായ്മ കുട്ടികള്ക്ക് ഏറെ ഉപകരിക്കുമെന്ന് ഹൈബി ഈഡന് എം.എല്.എ ഉദ്ഘാടനം നിര്വഹിച്ച് പറഞ്ഞു. കുട്ടികള്ക്ക് മാത്രമായി ഒരു തിയേറ്റര് കേരളത്തില് ഇല്ല. കുട്ടികള്ക്കായുള്ള ഇത്തരം സംരംഭങ്ങള് കുട്ടികളുടെ ക്രിയാത്മകത വര്ദ്ധിപ്പിക്കാനവസരം നല്കും. ഇത്തരം മേളകള് കുട്ടികളുടെ സര്ഗ ശേഷി വളര്ത്തുന്നതില് പ്രധാന പങ്കുവഹിക്കുകയും ഭാവിയില് നല്ല ചലചിത്ര സംസ്കാരം വളര്ത്താന് അവസരമൊരുക്കുയും ചെയ്യുമെന്ന് അദ്ദേഹം കൂട്ടിച്ചേര്ത്തു. ചടങ്ങില് ജില്ലാകളക്ടര് പി.ഐ.ഷെയ്ക്ക് പരീത് അദ്ധ്യക്ഷത വഹിച്ചു. രണ്ടു മാസക്കാലം കുട്ടികളുടെ മാനസിക വളര്ച്ച വികസിപ്പിക്കാനും കലാസ്വാദനശേഷികള് വിപുലപ്പെടുത്താനുമുളള പരിപാടികളാണ് മുഖ്യമായും വമേളയോടനുബന്ധിച്ച് സംഘടിപ്പിക്കുന്നതെന്ന് കളക്ടര് വ്യക്തമാക്കി.
മജീദ് മജീദിയുടെ ചില്ഡ്രന്സ് ഓഫ് ഹെവന് എന്ന ചിത്രമായിരുന്നു ഉദ്ഘാടന ചിത്രം. ഇതിനു മുന്നോടിയായി പബ്ലിക് റിലേഷന് വകുപ്പ് നിര്മിച്ച സംവിധായകന് അരവിന്ദനെക്കുറിച്ചുളള ഡോക്യുമെന്ററിയുടെ പ്രത്യേക പ്രദര്ശനവും നടന്നു. കുട്ടികളെ ഏറെ രസിപ്പിക്കുന്നതിനായി ചാര്ളി ചാപ്ലിന്റെ ചലചിത്രങ്ങളും മേളയില് ഉള്പെടുത്തിയിട്ടുണ്ട്. കുട്ടികളുടെ അന്താരാഷ്ട്ര ചലച്ചിത്രമേളയ്ക്കു പുറമെ പി.ആര്.ഡി നിര്മിച്ച ഡോക്യുമെന്ററി, കുട്ടികള് നിര്മിച്ച ഡോക്യുമെന്ററികള്, ബാലസാഹിത്യ ക്യാമ്പ്, ചിത്രരചന കളരി, കവിയരങ്ങ്, വനിതകളുടെ പഞ്ചാരിമേളം പരിസ്ഥിതി സംരക്ഷണ ബോധവത്കരണ ക്ലാസുകള്, മാജിക് പ്രദര്ശനം, വിവിധ റസിഡന്സ് അസോസിയേഷനുകളെ പങ്കെടുപ്പിച്ച് നൃത്തം, സംഗീതം, നാടകം, മോണോആക്ട്, കഥാപ്രസംഗം, മിമിക്രി എന്നീ കലകളും എല്ലാ ദിവസവും വൈകിട്ട് നാലു മുതല് നടക്കും.
ചലച്ചിത്ര നിര്മാണ പരിശീലന കളരിയില് കേരളത്തിലെ പ്രമുഖ ചലച്ചിത്ര സംവിധായകര്, അഭിനേതാക്കള് എന്നിവര് കുട്ടികള്ക്ക് ക്ലാസുകള് എടുക്കും. പരിശീലന പരിപാടിയുടെ സമാപനത്തില് പൂര്ണമായും കുട്ടികളുടെ പങ്കാളിത്തത്തോടെ ഹ്രസചിത്രം നിര്മിക്കും. സംസ്ഥാന വിദ്യാഭ്യാസ വകുപ്പു നടത്തിയ ചലച്ചിത്ര മേളയില വിജയികളായ ചലച്ചിത്ര പരിശീലന പരിപാടിക്കും നേതൃത്വം നല്കും.
ഡപ്യൂട്ടി മേയര് ബി.ഭദ്ര, കൗണ്സിലര് ലിനോ ജേക്കബ്, ബാലസാഹിത്യത്തിന് കേന്ദ്രസാഹിത്യ അക്കാദമി അവാര്ഡു ലഭിച്ച സിപ്പി പളളിപ്പുറം, മികച്ച ബാലനടന് കേന്ദ്ര ഗവ: അവാര്ഡ് ലഭിച്ച യാഷ്.കെ.മാളവിക, സംസ്ഥാന വിദ്യാഭ്യാസ വകുപ്പ് നടത്തിയ ചലച്ചിത്രമേളയില് ഏറ്റവും നല്ല സംവിധായികയ്ക്കുളള അവാര്ഡു ലഭിച്ച ദേവ് കൃഷ്ണ എസ് നാഥ്, കെ.എല്.മോഹനവര്മ എന്നിവര് മുഖ്യാതിഥികളായിരുന്നു. ജില്ലാ ശിശുക്ഷേമ സമിതി വൈസ് പ്രസിഡന്റ് പി.രാധാകൃഷ്ണന്, കെ.എം.ശരത്ചന്ദ്രന്, വി.എം.ഷംസുദ്ദീന്, സൈനബ മമ്മു, ഇഗ്നേഷ്യസ് ലൂക്കോസ്, ഹാര്ട്ട്ലൈറ്റ് അസോസിയേഷന് പ്രസിഡന്റ് കെ.കെ.പ്രകാശ് തുടങ്ങിയവര് സംബന്ധിച്ചു.
