കൊച്ചി: 32 കെഎസ്ആര്ടിസി ദീര്ഘദൂര സര്വീസുകള് കൂടി വൈറ്റില മൊബിലിറ്റി ഹബ്ബ് വഴി സര്വീസ് നടത്തുമെന്ന് മന്ത്രി വി.എസ്.ശിവകുമാര് പറഞ്ഞു. ഇന്നലെ(ജനുവരി-6) രാത്രിയോടെ ഇവ ഓടിത്തുടങ്ങി. മൊബിലിറ്റി ഹബ്ബില് ആരംഭിച്ച കെഎസ്ആര്ടിസി സ്റ്റേഷന് മാസ്റ്റര് ഓഫീസ് ഉദ്ഘാടനം ചെയ്യുകയായിരുന്നു മന്ത്രി.
ജനുവരി ഒടുവില് 1000 പുതിയ ബസ്സുകള് കൂടി നിരത്തിലിറങ്ങും. ഇതില് നല്ലൊരു പങ്ക് കൊച്ചിയ്ക്ക് നല്കും. കഴിഞ്ഞ ഏഴു മാസം കൊണ്ട് കെഎസ്ആര്ടിസിയുടെ വരുമാനത്തില് ഏഴു കോടിയുടെ വര്ദ്ധനയുണ്ടായി. ജീവനക്കാരെ വിശ്വാസത്തിലെടുത്തു കൊണ്ട് കോര്പ്പറേഷന്റെ പ്രവര്ത്തനം മെച്ചപ്പെടുത്തുകയാണ് സര്ക്കാര് ലക്ഷ്യം. അതിന്റെ ഭാഗമായാണ് കഴിഞ്ഞ മാസം 3500 താല്കാലിക ജീവനക്കാരെ സ്ഥിരപ്പെടുത്താന് തീരുമാനിച്ചത്. കെഎസ്ആര്ടിസി സ്റ്റേഷന്മാസ്റ്റര് ഓഫീസ് തുറക്കുന്നതോടെ ഓണ്ലൈന് റിസര്വേഷന് സൗകര്യം കൂടി ജനങ്ങള്ക്ക് ലഭ്യമാകും, മന്ത്രി പറഞ്ഞു.
മൊബിലിറ്റി ഹബ്ബ് പോലുള്ള കൂടുതല് അടിസ്ഥാന സൗകര്യങ്ങള് ഒരുക്കി കൊച്ചി മെട്രോ റെയില് പദ്ധതി സാക്ഷാത്കരിക്കുകയാണ് ലക്ഷ്യമെന്ന് റോഡ് സുരക്ഷാ സെല് ഉദ്ഘാടനം ചെയ്ത് മന്ത്രി കെ.ബാബു പറഞ്ഞു. റോഡു സുരക്ഷാ ദശകവുമായി ബന്ധപ്പെട്ടുള്ള ബോധവല്കരണ നടപടികള്ക്കൊപ്പം നിയമം നടപ്പാക്കാനുള്ള പ്രതിബദ്ധതയും ഉദ്യോഗസ്ഥരുടേയും യാത്രികരുടേയും ഭാഗത്തു നിന്നുണ്ടാകണമെന്ന് അദ്ദേഹം പറഞ്ഞു.
ബെന്നി ബെഹ്നാന് എംഎല്എ ചടങ്ങില് അദ്ധ്യക്ഷത വഹിച്ചു. മേയര് ടോണി ചമ്മിണി, എംഎല്എമാരായ ഡൊമനിക്ക് പ്രസന്റേഷന്, ഹൈബി ഈഡന്, കെഎസ്ആര്ടിസി ജനറല് മാനേജര് ജി.വേണുഗോപാല്, മാനേജര് എം.ഇര്ഷാദ്, മൊബിലിറ്റി ഹബ്ബ് എം.ഡി. ഡോ.എം.ബീന, ഡെപ്യൂട്ടി ട്രാന്സപോര്ട്ട് കമ്മീഷണര് പി.എ.സൈനുദ്ദീന്, ആര്ടിഒ ടി.ജെ.തോമസ്, എടിഒ കെ.സി.വേണുഗോപാലന്, കൗണ്സിലര് സുനിത ഡികസ്ണ് എന്നിവര് പങ്കെടുത്തു.
