ന്യൂയോര്ക്ക്: ന്യൂയോര്ക്കിലെ സപ്തംബര് 11 സ്മാരകത്തില് ദിവസേനയുള്ള സന്ദര്ശനത്തിനു നിയന്ത്രണം ഏര്പ്പെടുത്തി. സുരക്ഷാ പ്രശ്നങ്ങളും നിര്മാണ പ്രവര്ത്തനങ്ങളും മുന്നിര്ത്തിയാണിത്. ലോകത്തിന്റെ വിവിധ ഭാഗങ്ങളില്നിന്ന് സന്ദര്ശനത്തിനെത്തുന്നവര് യാത്രാപരിപാടിയുടെ വിശദവിവരങ്ങള് സമര്പ്പിക്കണമെന്നും അധികൃതര് വ്യക്തമാക്കി.
ഭീകരാക്രമണത്തിന്റെ പത്താം വാര്ഷികമായി സപ്തംബര് 12 നാണ് പൊതുജനങ്ങള്ക്ക് പ്രവേശനം അനുവദിച്ചിരുന്നത്. 10 ലക്ഷം പേരാണ് അന്ന് വേള്ഡ് ട്രേഡ് സെന്റര് സന്ദര്ശിക്കാനെത്തിയതെന്ന് ഔദ്യോഗിക വൃത്തങ്ങള് കഴിഞ്ഞ ദിവസം വ്യക്തമാക്കിയിരുന്നു. വേള്ഡ് ട്രേഡ് സെന്റര് നിലനിന്നിരുന്ന സ്ഥലത്ത് മ്യൂസിയം നിര്മാണം ആരംഭിക്കാന് പദ്ധതിയിട്ടതായി ന്യൂയോര്ക്ക് മേയര് മൈക്കല് ബ്ലും ബെര്ഗ് പറഞ്ഞു. അതുകൊണ്ടുതന്നെ സ്മാരകത്തില് ഉടന് പ്രവേശനം അനുവദിക്കാന് സാധ്യതയില്ലെന്നും അദ്ദേഹം കൂട്ടിച്ചേര്ത്തു. ദിവസേന സ്മാരകം സന്ദര്ശിക്കുന്നതിനായി 10,000 പേര് എത്തുന്നുണ്ടെന്നും സ്റ്റാച്യൂ ഓഫ് ലിബര്ട്ടിയും എംപെയര് സ്റ്റേറ്റ് ബില്ഡിംഗും സന്ദര്ശിക്കുന്നവരുടെ എണ്ണം 3.5 ദശലക്ഷം കവിഞ്ഞു എന്നും റിപ്പോര്ട്ടില് പറയുന്നു.
