ന്യൂദല്ഹി: അമേരിക്കയില് ജയിലില് കഴിയുന്ന ലഷ്ക്കര് ഭീകരന് ഡേവിഡ് കോള്മാന് ഹെഡ്ലിയ്ക്കും തഹാവൂര് ഹുസൈന് റാണയുള്പ്പെടെയുള്ള കൂട്ടാളികള്ക്കുമെതിരേ 2008ലെ മുംബൈ ഭീകരാക്രമണ കേസില് കുറ്റപത്രം സമര്പ്പിക്കാന് കേന്ദ്ര ആഭ്യന്തര മന്ത്രാലയം ദേശീയ അന്വേഷണ ഏജന്സിയ്ക്ക് അനുമതി നല്കി.
ഹെഡ്ലിയ്ക്കും റാണയ്ക്കും പുറമേ പാക് ഭീകരരായ ഹഫീസ് സയീദ്, സക്കി ഉര് റഹ്മാന് ലഖ്വി, അബ്ദുര് റഹ്മാന് സയീദ്, ഇല്യാസ് കശ്മീരി, സാജിദ് മജീദ്, ഐഎസ്ഐ ഉദ്യോഗസ്ഥരായ മേജര് ഇക്ബാല്, മേജര് സമീര് അലി ഉള്പ്പെടെയുള്ള ഏഴുപേരാണ് കുറ്റപത്രത്തിലുള്പ്പെടുന്നത്. ആക്രമണത്തില് ഇവര്ക്കുള്ള പങ്ക് ഉള്പ്പെടുന്ന കുറ്റപത്രം എന്.ഐ.എ ഉടന് കോടതിയില് സമര്പ്പിച്ചേക്കും.
യുദ്ധക്കുറ്റം ഉള്പ്പെടെ വിവിധ ക്രിമിനല് കുറ്റങ്ങളാണ് ഇവര്ക്കെതിരേ ചുമത്തിയിട്ടുള്ളത്. 2009 നവംബര് 12നാണ് ഹെഡ്ലിയ്ക്കും റാണയ്ക്കും മറ്റുള്ളവര്ക്കുമെതിരേ എന്.ഐ.എ കേസ് രജിസ്റ്റര് ചെയ്തത്. 2009 ഒക്ടോബറില് എഫ്.ബി.ഐയുടെ പിടിയിലായ ഹെഡ്ലിയും റാണയും ഇപ്പോള് ഷിക്കാഗോ ജയിലിലാണ്.
നിയമമന്ത്രായത്തിന്റെ ഉപദേശത്തിന്റെ കൂടി അടിസ്ഥാനത്തിലാണ് കുറ്റപത്രം സമര്പ്പിക്കാന് എന്.ഐ.എയ്ക്ക് ആഭ്യന്തര മന്ത്രാലയം അനുമതി നല്കിയത്. എന്നാല് ഹെഡ്ലിയെയും റാണയെയും എന്.ഐ.ഐ കസ്റ്റഡിയില് ലഭിക്കാന് സാധ്യതയില്ല. വധശിക്ഷ ഒഴിവാക്കുക, മറ്റു രാജ്യങ്ങള്ക്ക് കൈമാറാതിരിക്കുക എന്ന നിബന്ധനകള് പ്രകാരമാണ് ഇരുവരും തെളിവുകള് നല്കാമെന്ന് യുഎസ് അധികൃതരോട് സമ്മതിച്ചിട്ടുള്ളത്.
