ന്യൂദല്ഹി: നിലവാരം കുറഞ്ഞ കടലാസ് നല്കിയതിനാല് ഇന്ത്യന് റിസര്വ് ബാങ്കിന് കറന്സി നോട്ട് അച്ചടിക്കാനുള്ള കടലാസ് നല്കി വന്നിരുന്ന ബ്രിട്ടീഷ് കമ്പനി ഡിലാറോക്ക് വിലക്കേര്പ്പെടുത്തിയതായി ധനകാര്യ സഹമന്ത്രി നമോ നാരായണ് മീണ രാജ്യസഭയെ അറിയിച്ചു.
2010 ജൂലായ്, ആഗസ്റ്റ് മാസങ്ങളില് നടത്തിയ പരിശോധനയിലാണ് കറന്സി നോട്ടിനുള്ള കടലാസ് നിശ്ചിത മാനദണ്ഡങ്ങള്ക്ക് അനുസൃതമായല്ല ബ്രിട്ടീഷ് കമ്പനി നല്കിയിരിക്കുന്നതെന്ന് കണ്ടതെന്നും മന്ത്രി പറഞ്ഞു. ഭാരതീയ റിസര്വ് ബാങ്ക് നോട്ട് മുദ്രണ് പ്രൈവറ്റ് ലിമിറ്റഡ് കമ്പനിയുമായാണ് ഡിലാറു കമ്പനി കടലാസ് നല്കാനുള്ള കരാര് ഉണ്ടാക്കിയിരിക്കുന്നത്. അടുത്തിടെ പിടിച്ചെടുത്ത വ്യാജ നോട്ടുകളും യഥാര്ത്ഥ നോട്ടുകളും ഒരേ ഗുണനിലവാരം പുലര്ത്തുന്നതാണെന്നും രണ്ട് നോട്ടുകളും തമ്മില് അത്രക്ക് സാദൃശ്യമുള്ള നോട്ടുകളാണെന്നും ഇതില്ത്തന്നെ ബാങ്കുകള്ക്കുപോലും ഈ നോട്ടുകള് തമ്മിലുള്ള വ്യത്യാസം തിരിച്ചറിയാന് ബുദ്ധിമുട്ടുണ്ടെന്നും മന്ത്രി വ്യക്തമാക്കി.
പാക്കിസ്ഥാനില് വളരെ സുരക്ഷിതമായ അച്ചടിശാലകളില് അച്ചടിക്കുന്ന വ്യാജനോട്ടുകള് ഇന്ത്യയിലേക്ക് കടത്തിക്കൊണ്ടുവരികയും ഇവിടെ വിതരണം ചെയ്ത് ഇന്ത്യന് സമ്പദ്വ്യവസ്ഥയെ തന്നെ അസ്ഥിരപ്പെടുത്തുന്നു എന്നാണ് ഇന്റലിജന്റ്സ് റിപ്പോര്ട്ട് വ്യക്തമാക്കുന്നത്.
അതേസമയം, ഡിലാറോ നല്കി വരുന്ന വിതരണം തുടരാന് അനുവദിക്കില്ലെന്നും എന്നാല് ഭാരതീയ റിസര്വ് ബാങ്ക് നോട്ട് മുദ്രണ് പ്രൈവറ്റ് ലിമിറ്റഡ് കമ്പനി, ഡിലാറോവിനെ വിതരണം നിര്ത്തിവെക്കുന്നതു സംബന്ധിച്ച വിവരം അറിയിക്കുമെങ്കിലും മാനദണ്ഡങ്ങള്ക്കനുസൃതമായതിനാല് കര്ശനമായി ഇത് നിര്ത്താന് സാധിക്കില്ലെന്നും മന്ത്രി രാജ്യസഭയെ അറിയിച്ചു.
