ബെംഗളൂരു : കോൺഗ്രസ് സർക്കാരിന്റെ ഗ്യാരന്റി പദ്ധതികളെയാണ് യുഎസ് പ്രസിഡന്റ് ഡൊണാൾഡ് ട്രമ്പ് വരെ കോപ്പിയടിക്കുന്നതെന്ന് കർണാടക മുഖ്യമന്ത്രി ഡി.കെ. ശിവകുമാർ.
കെപിസിസി ഓഫീസിൽ നടന്ന പരിപാടിയിൽ സംസാരിക്കവേയാണ് ഡികെയുടെ ഈ പ്രസ്താവന. ‘കോൺഗ്രസ് സർക്കാരിന്റെ ജനപക്ഷ ഗ്യാരണ്ടി പദ്ധതികൾക്ക് വ്യാപകമായ സ്വീകാര്യത ലഭിച്ചു. പ്രതിപക്ഷ പാർട്ടികൾ ഗ്യാരണ്ടി പദ്ധതികൾ നടപ്പിലാക്കാൻ കഴിയില്ലെന്ന് വിമർശിച്ചു. എന്നാൽ ഇന്ന് നമ്മൾ രാജ്യത്തിന് മാതൃകയായി മാറിയിരിക്കുന്നത് ഗ്യാരണ്ടികൾ മൂലമാണ്.
ബീഹാർ, മധ്യപ്രദേശ്, ഉത്തർപ്രദേശ് തുടങ്ങി എല്ലായിടത്തും കർണാടക മോഡൽ പകർത്തി. ഇപ്പോൾ അമേരിക്കയിലെ ട്രംപും അത് പകർത്തുകയാണ്. ഞങ്ങളുടെ ആശയം ലോകത്തിന് മുഴുവൻ പരിചിതമായിക്കൊണ്ടിരിക്കുകയാണ് .
“ഞങ്ങൾ എല്ലാ പാർട്ടികൾക്കും ജാതികൾക്കും ഗ്യാരണ്ടി പദ്ധതികൾ നൽകുന്നു. 4.44 കോടി ആളുകൾക്ക് ഞങ്ങൾ ഭക്ഷ്യധാന്യങ്ങൾ നൽകുന്നു. കോൺഗ്രസിന്റെ ശക്തി രാജ്യത്തിന്റെയും അതിന്റെ ചരിത്രത്തിന്റെയും ശക്തിയാണ്.
കോൺഗ്രസ് പാർട്ടി എസ്സിപിയും ടിഎസ്പിയും നടപ്പിലാക്കി. വിദ്യാർത്ഥികൾക്ക് ബസ് പാസുകൾ സൗജന്യമായി നൽകുന്നു. ഞങ്ങൾ സർക്കാരിനെ ജനങ്ങളുടെ വീട്ടുപടിക്കൽ എത്തിച്ചു. പൊതുസേവനം ചെയ്യുന്നു. ,” എന്നും അദ്ദേഹം പറഞ്ഞു.
അടുത്തിടെ റിപ്പബ്ലിക്കൻ പാർട്ടി പ്രതിനിധി സഭയുടെയും സെനറ്റിന്റെയും നിയന്ത്രണം നിലനിർത്തിയാൽ ഓരോ മുതിർന്ന അമേരിക്കൻ പൗരനും 5,000 ഡോളർ നൽകുമെന്ന് പ്രസിഡന്റ് ഡൊണാൾഡ് ട്രംപ് വാഗ്ദാനം ചെയ്തിരുന്നു . ട്രംപിന്റെ ഈ പ്രഖ്യാപനത്തെയാണ് കർണാടകയിലെ ഗ്യാരണ്ടി പദ്ധതികളോട് ഡി കെ ശിവകുമാർ താരതമ്യം ചെയ്തത്.
