ഫസില്ക്ക: പാകിസ്ഥാനില് നിന്ന് ഡ്രോണ് വഴി ആയുധങ്ങളും മയക്കുമരുന്നും എത്തിച്ച് കടത്തിയ മൂന്ന് പേരെ ഫസില്ക്ക പോലീസ് അറസ്റ്റ് ചെയ്തു. ഫിറോസ്പുര് ജില്ലയില് താമസിക്കുന്ന വരീന്ദര് സിങ് എന്ന രവി, രഞ്ജീത് സിങ് എന്ന ജീത, നിഷാന് സിങ് എന്ന ധാമു എന്നിവരാണ് അറസ്റ്റിലായത്.
ഇവരില് നിന്ന് വിദേശനിര്മിത രണ്ട് ഗ്ലോക്ക് പിസ്റ്റളുകള്, നാല് വെടിയുണ്ടകള്, 50 ഗ്രാം ഹെറോയിന്, മൊബൈല് ഫോണുകള് എന്നിവ പിടിച്ചെടുത്തു.
ഫസില്ക്ക-ഫിറോസ്പുര് റോഡില് പോലീസ് നടത്തിയ വാഹന പരിശോധനയ്ക്കിടെയാണ് മൂന്ന് പേരും പിടിയിലായത്. സംശയാസ്പദമായി ബൈക്കില് സഞ്ചരിച്ച ഇവരെ തടഞ്ഞുനിര്ത്തി പരിശോധിച്ചപ്പോഴാണ് ആയുധങ്ങളും ഹെറോയിനും കണ്ടെത്തിയത്.
പ്രാഥമിക ചോദ്യംചെയ്യലില് സപ്തംബര് 4ന് പാകിസ്ഥാനില് നിന്ന് ഡ്രോണ് വഴിയാണ് ആയുധക്കടത്ത് നടത്തിയതെന്ന് പ്രതികള് പറഞ്ഞതായി പോലീസ് വ്യക്തമാക്കി. നേരത്തെയും അതിര്ത്തിക്കപ്പുറത്ത് നിന്ന് ഹെറോയിന് എത്തിച്ചിട്ടുണ്ടെന്നും പ്രതികള് ചോദ്യംചെയ്യലില് സമ്മതിച്ചു. അറസ്റ്റിലായവരുടെ മൊബൈല് ഫോണുകളില്നിന്നുള്ള വിവരങ്ങള് പരിശോധിച്ച് അതിര്ത്തിക്കപ്പുറത്തെ ബന്ധങ്ങളും ഭാരതത്തിലെ വിതരണശൃംഖലയും കണ്ടെത്താനുള്ള അന്വേഷണം തുടരുകയാണ്. കൂടുതല് പേര്ക്ക് സംഭവത്തില് പങ്കുണ്ടോയെന്നും പോലീസ് പരിശോധിക്കുന്നുണ്ട്.
