നടി ഉർവശിയ്ക്കെതിരെ നിർമാതാവും നടൻ പൃഥ്വിരാജിന്റെ ഭാര്യയുമായ സുപ്രിയ മേനോൻ . സ്വന്തം നാട്ടുകാരുടെ മുന്നിൽ സംസാരിക്കുമ്പോൾ മലയാളത്തിൽ സംസാരിച്ചാൽ മതിയെന്നും , ഇംഗ്ലീഷിൽ കടുക് വറുക്കേണ്ട കാര്യമുണ്ടോയെന്നും അവതാരകയോട് ഉർവശി ചോദിച്ചതാണ് സുപ്രിയയുടെ വിമർശനത്തിന് കാരണം.
‘ ഇംഗ്ലീഷിൽ സംസാരിക്കുന്നതിൽ എപ്പോഴുമുള്ള ഈ സംവാദം എനിക്ക് മനസിലാകുന്നില്ല. പബ്ലിക് സ്പേസിലേക്ക് വന്നത് മുതൽ ഇത് നേരിടുന്ന ഒരാൾ എന്ന നിലയിൽ ഞാനെപ്പോഴും ഇതിൽ കൺഫ്യൂസ്ഡ് ആണ്. നമ്മൾ നമ്മളുടെ കുട്ടികളെ ഇംഗ്ലീഷ് മീഡിയം സ്കൂളിലും കോളേജിലും അയക്കുന്നു. നമ്മളുടെ ആളുകൾ വിദേശത്തേക്ക് പോകുന്നു.
ആഗോള തലത്തിൽ നമ്മളാണ് ചില കുടിയേറ്റങ്ങളിൽ കൂടുതൽ. എന്നിട്ടും ഒരാൾ ഇംഗ്ലീഷിൽ സംസാരിക്കുമ്പോൾ എന്തിനാണ് നമ്മളത് അഹങ്കാരമായി കാണുന്നത് . ഒരാൾ മറ്റൊരു ഭാഷയിൽ സംസാരിക്കുന്നത് മലയാള ഭാഷ പ്രൗഡി കുറയ്ക്കുന്നത് എങ്ങനെയാണ്. ഇത് കുഴപ്പിക്കുന്നതാണെന്ന് സുപ്രിയ മേനോൻ ഈ വിഷയവുമായി ബന്ധപ്പെട്ട് വന്ന ഒരു റിയാക്ഷൻ വീഡിയോക്ക് കമന്റ് ചെയ്തു.
മലയാളിയാണെങ്കിലും സുപ്രിയ വളർന്നതും പഠിച്ചതും ജോലി ചെയ്തതും ഡൽഹിയിലും മുംബെെയിലുമൊക്കെയാണ്. അക്കാലത്ത് സുപ്രിയ ഒരു അഭിമുഖത്തിൽ പറഞ്ഞ വാക്കുകൾ വലിയ ചർച്ചയായി. പൃഥ്വിരാജിന്റെ ഇംഗ്ലീഷ് ഭാഷാ പ്രാവീണ്യത്തെ പ്രശംസിച്ചതായിരുന്നു സുപ്രിയ. പിന്നാലെ വ്യാപകമായി ട്രോളുകൾ വന്നു. പൃഥ്വിരാജിനും ഇംഗ്ലീഷ് ഭാഷയുടെ പേരിൽ ട്രോളുകൾ നേരിടേണ്ടി വന്നിട്ടുണ്ട്.
