കോട്ടയം: മനുഷ്യരാശിയുടെ നിലനില്പ്പിനും തൊഴിലാളിവര്ഗത്തിന്റെ ഭാവിക്കും പരിസ്ഥിതി സംരക്ഷണം അനിവാര്യമാണെന്ന് ബിഎംഎസ് അഖിലേന്ത്യാ അധ്യക്ഷന് എസ്. മല്ലേശം പറഞ്ഞു. ബിഎംഎസ് സംസ്ഥാന സമിതിയുടെ അമൃതാദേവി പരിസ്ഥിതി പുരസ്കാരം പരിസ്ഥിതി പ്രവര്ത്തകന് രാജേഷ് കടമാന്ചിറക്ക് സമര്പ്പിച്ച് സംസാരിക്കുകയായിരുന്നു മല്ലേശം.
സാമ്പത്തിക വളര്ച്ചയും പ്രകൃതി സംരക്ഷണവും പരസ്പരവിരുദ്ധമല്ല. പ്രകൃതിയോട് ഇണങ്ങിനിന്നുള്ള വികസനമാണ് കാലഘട്ടത്തിന്റെ ആവശ്യം. ഭൂമി എന്റെ മാതാവാണ്, ഞാന് അവളുടെ മകനാണ് എന്നു പഠിപ്പിച്ച മഹത്തായ പാരമ്പര്യമാണ് നമ്മുടേത്. മനുഷ്യന്റെ ആവശ്യങ്ങള് നിറവേറ്റാനുള്ളതെല്ലാം ഭൂമിയിലുണ്ട്, എന്നാല് അവന്റെ അത്യാഗ്രഹങ്ങള്ക്കുള്ളതില്ല എന്ന ഗാന്ധിജിയുടെ വാക്കുകള് വിസ്മരിച്ചതിന്റെ ഫലമാണ് ഇന്നത്തെ കാലാവസ്ഥാ പ്രതിസന്ധി. അടിക്കടിയുണ്ടാകുന്ന പ്രളയങ്ങളും കൊടും ചൂടും വരള്ച്ചയും പ്രകൃതി നമുക്ക് തരുന്ന മുന്നറിയിപ്പുകളാണെന്നും ബിഎംഎസ് അഖിലേന്ത്യാ അധ്യക്ഷന് പറഞ്ഞു.
ബിഎംഎസ് സംസ്ഥാന വൈസ് പ്രസിഡന്റ് സി.ജി. ഗോപകുമാര് അദ്ധ്യക്ഷത വഹിച്ചു. ആര്എസ്എസ് ക്ഷേത്രീയ ബൗദ്ധിക് പ്രമുഖ് കെ.പി. രാധാകൃഷ്ണന് മുഖ്യ പ്രഭാഷണം നടത്തി. ബിഎംഎസ് സംസ്ഥാന ഖജാന്ജി സിബി വര്ഗീസ് അവാര്ഡ് ജേതാവിനെ പരിചയപ്പെടുത്തി. ജനറല് സെക്രട്ടറി സി. ബാലചന്ദ്രന്, സംഘടന സെക്രട്ടറി കെ. മഹേഷ്, എം.പി. രാജീവന്, അഡ്വ. എസ്. ആശാമോള്, കെ.കെ. വിജയകുമാര്, കോട്ടയം ജില്ലാ പ്രസിഡന്റ് എസ്. വിനയകുമാര്, സെകട്ടറി പി.ആര്. രാജീവ് തുടങ്ങിയവര് പ്രസംഗിച്ചു. പുരസ്കാര ജേതാവ് രാജേഷ് കടമാന്ചിറ മറുപടി പറഞ്ഞു. വനംവകുപ്പ് നല്കിയ വൃക്ഷത്തൈകളും സമ്മേളനത്തില് വിതരണം ചെയ്തു.
