കൊച്ചി: ഭാരതത്തിന്റെ കപ്പല്‍ അറ്റകുറ്റപ്പണി വ്യവസായം ശക്തിപ്പെടുത്തുന്നതിനായി കൊച്ചിന്‍ ഷിപ്‌യാര്‍ഡ് ലിമിറ്റഡും ഡിപി വേള്‍ഡ് ഗ്രൂപ്പിന്റെ ഭാഗമായ ഡ്രൈഡോക്‌സ് വേള്‍ഡും 50:50 സംയുക്ത സംരംഭത്തിന് ധാരണയില്‍.
കൊച്ചിയിലെ ഇന്റര്‍നാഷണല്‍ ഷിപ്പ് റിപ്പയര്‍ ഫെസിലിറ്റിയെ കൂടുതല്‍ ശക്തിപ്പെടുത്തുകയും വിപുലീകരിക്കു കയും ചെയ്യുന്നതിനാണ് ഈ സംയുക്ത സംരംഭം. ന്യൂദല്‍ഹിയില്‍ നടന്ന ബ്രിക്‌സ് ഉച്ചകോടി 2026ന്റെ ഭാഗമായി കേന്ദ്ര തുറമുഖ – ഷിപ്പിങ്-ജലഗതാഗത മന്ത്രി സര്‍ബാനന്ദ സോനോവാളിന്റെയും യുഎഇ അഡ്വാന്‍സ്ഡ് സയന്‍സ് ആന്‍ഡ് ടെക്‌നോളജി അസിസ്റ്റന്റ് വിദേശകാര്യ മന്ത്രി ഒമ്രാന്‍ ഷറഫ് അല്‍ഹാഷിമിയുടെയും സാന്നിധ്യത്തില്‍ ഡ്രൈഡോക്‌സ് വേള്‍ഡ് സിഇഒ ക്യാപ്റ്റന്‍ റാഡോ അന്റോളോവിക്കും കൊച്ചിന്‍ ഷിപ്‌യാര്‍ഡ് സിഎംഡി ജോസ് വി.ജെ.യും ഇതുസംബന്ധിച്ച കരാറില്‍ ഒപ്പുവച്ചു.
ഇന്ത്യ മാരിടൈം വീക്ക് 2025ല്‍ ഇരുസ്ഥാപനങ്ങളും തമ്മില്‍ ഒപ്പുവച്ചിരുന്ന ധാരണാപത്രത്തിന്റെ തുടര്‍ച്ചയായാണ് സംയുക്ത സംരംഭം രൂപീകരിച്ചത്. കപ്പല്‍ അറ്റകുറ്റപ്പണി, എന്‍ജിനീയറിങ്, ഫാബ്രിക്കേഷന്‍, അനുബന്ധ മാരിടൈം സേവനങ്ങള്‍ എന്നിവയില്‍ സഹകരണം ശക്തിപ്പെടുത്തുകയാണ് ഈ സംയുക്ത സംരംഭത്തിന്റെ മുഖ്യലക്ഷ്യം. സിഎസ്എലിന്റെ കപ്പല്‍നിര്‍മാണ-അറ്റകുറ്റപ്പണി രംഗത്തെ ആഭ്യന്തര വൈദഗ്ധ്യവും ഡ്രൈഡോക്‌സ് വേള്‍ഡിന്റെ ആഗോള പരിചയവും സാങ്കേതിക മികവും സംയോജിപ്പിക്കുമെന്നതാണ് പദ്ധതിയുടെ പ്രത്യേകത.
ഈ പദ്ധതിയിലൂടെ കൊച്ചിയുടെ മാരിടൈം സേവന കേന്ദ്രമെന്ന സ്ഥാനം കൂടുതല്‍ ശക്തിപ്പെടുത്തുന്നതിനൊപ്പം കേരളത്തില്‍ കപ്പല്‍ അറ്റകുറ്റപ്പണി, എന്‍ജിനീയറിങ്, ഫാബ്രിക്കേഷന്‍, അനുബന്ധ മേഖലകള്‍ എന്നിവയില്‍ പുതിയ അവസരങ്ങള്‍ സൃഷ്ടിക്കുമെന്നാണ് പ്രതീക്ഷയെന്ന് ചടങ്ങില്‍ പങ്കെടുത്ത കേന്ദ്രമന്ത്രി സര്‍ബാനന്ദ സോനോവാളും യുഎഇ മന്ത്രി ഒമ്രാന്‍ ഷറഫ് അല്‍ഹാഷിമിയും പറഞ്ഞു. ഉയര്‍ന്ന നൈപുണ്യമുള്ള തൊഴിലവസരങ്ങള്‍ സൃഷ്ടിക്കുന്നതിനും അന്താരാഷ്‌ട്ര കപ്പല്‍വ്യൂഹങ്ങളെ കൊച്ചിയിലേക്ക് ആകര്‍ഷിക്കുന്നതിനും ഈ പങ്കാളിത്തം സഹായിക്കുമെന്നും അവര്‍ വ്യക്തമാക്കി.
