ആലപ്പുഴ: ആലപ്പുഴ മെഡിക്കല് കോളേജ് ആശുപത്രിയില് തിമിര ശസ്ത്രക്രിയക്കിടെ കണ്ണിലെ ലെന്സ് കണ്ണിന്റെ ഉള്ളിലേക്ക് ആഴ്ന്നു പോയെന്ന് പരാതി. ആറാട്ടുപുഴ കള്ളിക്കാട് സ്വദേശിനി ലത (67)ക്കാണ് ആശുപത്രിയില് നിന്ന് ദുരനുഭവം.
ഗുരുതര ചികിത്സാ പിഴവ് ഉണ്ടായിട്ടും ഇക്കാര്യം ആശുപത്രി അധികൃതര് മറച്ചു വച്ചെന്നും പരാതി ഉണ്ട്. തെറ്റ് തിരിച്ചറിഞ്ഞിട്ടും ആശുപത്രി അധികൃതര് കൈയൊഴിഞ്ഞെന്നും പറയുന്നു.
തിമിര ശസ്ത്രക്രിയയ്ക്കിടെ ലതയുടെ വലതു കണ്ണിലെ സ്വാഭാവിക ലെന്സ് കണ്ണിനുള്ളിലേക്ക് ആഴ്ന്നിറങ്ങി.ഇത് ശസ്ത്രക്രിയ നടത്തിയ ഡോക്ടര്മാരുടെ പിഴവെന്നാണ് കുടുംബത്തിന്റെ ആരോപണം.ഗുരുതര പിഴവ് സംഭവിച്ചിട്ടും ഇക്കാര്യം മണിക്കൂറുകളോളം ആശുപത്രി അധികൃതര് ബന്ധുക്കളില് നിന്ന് മറച്ചുവച്ചന്നും ആരോപണമുണ്ട്.
ലതയുടെ കണ്ണ് പഴയ സ്ഥിതിയിലാകണമെങ്കില് ഇനിയും മറ്റൊരു ശസ്ത്രക്രിയ കൂടി നടത്തണം. അത് ചെയ്യാന് സൗകര്യമുളളത് കോട്ടയം മെഡിക്കല് കോളേജിലാണെങ്കിലും അതിനുളള ക്രമീകരണം ഒരുക്കി നല്കാന് പോലും ആലപ്പുഴ മെഡിക്കല് കോളേജ് അധികൃതര് തയാറാകുന്നില്ലെന്നും പരാതിയുണ്ട്. എന്നാല് പിഴവൊന്നും ഉണ്ടായിട്ടില്ലെന്നും തിമിര ശസ്ത്രക്രിയയ്ക്കിടെ സാധാരണ ഗതിയില് ഉണ്ടാകാറുളള പ്രശ്നമാണിതെന്നുമാണ് മെഡിക്കല് കോളേജ് അധികൃതര് പറയുന്നത്.
