തിരുവനന്തപുരം: സംസ്ഥാനത്തെ വൈദ്യുതി പ്രതിസന്ധിയെക്കുറിച്ച് പ്രതിപക്ഷ നേതാവായിരിക്കെ വി.ഡി. സതീശന്‍ നിയമസഭയില്‍ നടത്തിയ പ്രസംഗത്തിന്റെ വീഡിയോ പങ്കുവെച്ച് ‘ഇപ്പോള്‍ കറന്റ് എവിടെ’യെന്ന് ആരാഞ്ഞ് ഡബ്ബിങ് ആര്‍ട്ടിസ്റ്റ് ഭാഗ്യലക്ഷ്മി.
‘എല്ലാ മലയാളികള്‍ക്കും സ്‌നേഹത്തിന്റെയും ഐശ്വര്യത്തിന്റെയും ഇന്ദിരാ പവര്‍കട്ട് ആശംസകള്‍’ എന്ന ട്രോള്‍ പോസ്റ്ററും ഇതോടൊപ്പം സോഷ്യല്‍ മീഡിയയില്‍ പങ്കുവെച്ചിട്ടുണ്ട്.
മുന്നറിയിപ്പൊന്നുമില്ലാതെ രാത്രി പത്തു മണിക്കും പന്ത്രണ്ടു മണിക്കും കറന്റ് കട്ട് ചെയ്യുന്നത് പതിവായിരിക്കുകയാണെന്നും മന്ത്രിമാര്‍ക്ക് ജനറേറ്ററും ഇന്‍വേര്‍ട്ടറും ഉള്ളതുകൊണ്ട് ഒന്നും അറിയണ്ടേന്നും ഭാഗ്യലക്ഷ്മി പരിഹസിക്കുന്നുണ്ട്.
രാത്രി കുഞ്ഞുങ്ങളെ ഉറക്കിക്കിടത്തുമ്പോള്‍ കറന്റ് പോകുന്നത് ജനങ്ങളെ കടുത്ത പ്രയാസത്തിലാക്കുന്നുവെന്ന ചില മാതാപിതാക്കളുടെ വിഡിയോകള്‍, രാത്രി കിടന്നുറങ്ങിയില്ലെങ്കില്‍ രാവിലെ എങ്ങനെ സ്‌കൂളില്‍ പോകുമെന്ന് ചോദിക്കുന്ന കുട്ടികളുടെ അനുഭവങ്ങള്‍ എന്നിവയും പോസ്റ്റിനൊപ്പമുണ്ട്.
ഇടതു പക്ഷ അനുഭാവിയായി അറിയപ്പെടുന്ന ഭാഗ്യലക്ഷ്മിയുടെ പോസ്റ്റിനുകീഴെ അനുകൂലമായും പ്രതികൂലമായും പ്രതികരണങ്ങള്‍ നിറയുകയാണ്.
