കൊച്ചി: രവീന്ദ്രന് മാസ്റ്ററുടെ സ്മരണാര്ത്ഥം രവീന്ദ്രന് മാസ്റ്റര് മ്യൂസിക്കല് ട്രസ്റ്റ് ഏര്പ്പെടുത്തിയ 2026ലെ രവീന്ദ്ര പുരസ്കാരത്തിന് പിന്നണി ഗായിക സുജാത മോഹന് അര്ഹയായി. ഭാവസാന്ദ്രമായ ആലാപന ശൈലികൊണ്ട് ഭാരത സംഗീത ഭൂപടത്തില് തനതായ വ്യക്തിമുദ്ര പതിപ്പിച്ച സുജാതയുടെ സമഗ്ര സംഭാവനകളെ മുന്നിര്ത്തിയാണ് പുരസ്കാരമെന്ന് ഭാരവാഹികള് വാര്ത്താസമ്മേളനത്തില് അറിയിച്ചു.
രവീന്ദ്രന് മാസ്റ്ററുടെ സംഗീതജീവിതത്തെ അനുസ്മരിച്ചുകൊണ്ട് കഴിഞ്ഞ രണ്ട് പതിറ്റാണ്ടുകളായി നല്കിവരുന്നതാണ് പുരസ്കാരം. ശ്രീകുമാരന് തമ്പി, കൈതപ്രം ദാമോദരന് നമ്പൂതിരി, വിദ്യാധരന് മാസ്റ്റര്, ഔസേപ്പച്ചന്, ജോണ്സണ് മാസ്റ്റര്, കെ.എസ്. ചിത്ര തുടങ്ങിയവരായിരുന്നു മുന്വര്ഷങ്ങളില് രവീന്ദ്ര പുരസ്കാരത്തിന് അര്ഹരായത്.
മാസ്റ്ററുടെ ജന്മദിനത്തോടനുബന്ധിച്ച് ട്രസ്റ്റ് സംഘടിപ്പിക്കുന്ന 21-ാമത് രവീന്ദ്ര സംഗീതോത്സവം നവംബര് 9ന് എറണാകുളം പാടിവട്ടം അസീസിയ കണ്വെന്ഷന് സെന്ററില് അരങ്ങേറും. രാവിലെ 9ന് ആരംഭിച്ച് രാത്രി പത്ത് വരെ നീളുന്ന അഖണ്ഡ സംഗീതാര്ച്ചനയില് മലയാളത്തിലെ പിന്നണി ഗായകരും യുവതലമുറയിലെ പ്രതിഭകളും ചേര്ന്ന് രവീന്ദ്രസംഗീതത്തിന്റെ മാസ്മരിക ഈണങ്ങള് വേദിയില് ആലപിക്കും.
രവീന്ദ്ര സംഗീതസന്ധ്യ നവംബര് 14ന് വൈകിട്ട് ആറിന് തൃശൂര് പഴുവില് അസീസിയ കണ്വെന്ഷന് സെന്ററില് നടക്കും. ഈ മെഗാ സാംസ്കാരിക നിശയില് സുജാത മോഹന് രവീന്ദ്ര പുരസ്കാരം സമര്പ്പിക്കും.
ചടങ്ങില് മധു ബാലകൃഷ്ണന്, അഫ്സല്, കല്ലറ ഗോപന്, നജീം അര്ഷാദ്, സുദീപ് കുമാര്, ജ്യോത്സ്ന, മൃദുല വാര്യര് എന്നിവര് നയിക്കുന്ന ഗാനമേളയും, നര്ത്തകിയും ചലച്ചിത്രതാരവുമായ ആശാ ശരത്, കലാമണ്ഡലം സോഫിയ സുദീപ് എന്നിവരുടെ നൃത്തസമര്പ്പണവും നടക്കുമെന്ന് കൊച്ചി പാടിവട്ടം അസീസിയ കണ്വെന്ഷന് സെന്ററില് നടത്തിയ വാര്ത്താസമ്മേളനത്തില് രവീന്ദ്രന് മാസ്റ്ററുടെ പത്നി ശോഭന രവീന്ദ്രന്, മകനും സംഗീതസംവിധായകനുമായ സാജന് മാധവ്, പ്രശസ്ത പിന്നണി ഗായകന് ബിജു നാരായണന്, അസീസിയ ഗ്രൂപ്പ് പിആര്ഒ ജലീല് താനത്ത് എന്നിവര് അറിയിച്ചു.
