തിരുവനന്തപുരം: കേരളത്തിൽ നിന്നുള്ള മലയാളി മാധ്യമ സംഘം യുപി മുഖ്യമന്ത്രി യോഗി ആദിത്യനാഥിനെ നേരിൽ കാണും. സർക്കാരിന്റെ വികസന പ്രവർത്തനങ്ങൾ നേരിൽ കണ്ട് മനസിലാക്കുന്നതിനും റിപ്പോർട്ട് ചെയ്യുന്നതിനും ഉത്തർപ്രദേശ് സന്ദർശിക്കുന്നതിന്റെ ഭാഗമായാണ് മുഖ്യമന്തിയെ നേരിൽ കാണുന്നത്.
കേരളത്തിൽ നിന്നും ജന്മഭൂമി ഉൾപ്പെടെയുള്ള വിവിധ പത്ര, ഇലക്ട്രോണിക്, റേഡിയോ, ഓൺലൈൻ മാധ്യമസ്ഥാപനങ്ങളിൽ നിന്നായി 11 മാധ്യമപ്രവർത്തകരാണ് ഉത്തർപ്രദേശ് സന്ദർശനത്തിനായി ഇന്നലെ ലക്നൗവിൽ എത്തിചേർന്നത്.
സെപ്തംബർ 6 മുതൽ 12 വരെയാണ് സന്ദർശനം. ഉത്തർപ്രദേശിലെ കാർഷിക വിദഗ്ധൻ പത്മശ്രീ രാം ശരൺ വർമയുമായും മാധ്യമ പ്രവർത്തകർ കൂടിക്കാഴ്ച നടത്തുകയും
അയോധ്യ രാമക്ഷേത്രം, റെയിൽവേ ഡിസൈൻ ആൻഡ് സ്റ്റാൻഡേർഡ്സ് ഓർഗനൈസേഷൻ, ഹിന്ദുസ്ഥാൻ എയറോനോട്ടിക്സ് ലിമിറ്റഡ്, ചിക്കൻകാരി വസ്ത്ര വ്യവസായം തുടങ്ങിയവയും പ്രസ് ടൂറിന്റെ ഭാഗമായി സന്ദർശിക്കും.
വിവിധ മേഖലകളില് സംസ്ഥാനത്തിന്റെ സംരംഭങ്ങളെയും പുരോഗതിയെയും കുറിച്ച് നേരിട്ട് മനസ്സിലാക്കുന്നതിന് മുതിർന്ന ഗവണ്മെൻ്റ് ഉദ്യോഗസ്ഥരുമായും കർഷകരുമായും ബന്ധപ്പെട്ട വ്യക്തികളുമായും ആശയവിനിമയം നടത്തുന്ന പ്രതിനിധി സംഘം വിവിധ സ്ഥാപനങ്ങളും വികസന പദ്ധതി പ്രദേശങ്ങളും സന്ദർശിക്കും. ഉത്തർപ്രദേശിന്റെ വികസന സംരംഭങ്ങൾ, നൂതനാശയങ്ങൾ, വിജയഗാഥകൾ എന്നിവ കേരളത്തിലെ ജനങ്ങളിലേക്കെത്തിക്കാൻ പങ്കെടുക്കുന്ന മാധ്യമ സ്ഥാപനങ്ങൾക്ക് പര്യടനത്തിലൂടെ അവസരം ലഭിക്കും.
ഇന്നലെ ഉച്ചയോടെ ലക്നൗവിൽ എത്തിയ മാധ്യമ സംഘത്തെ പിഐബി ലക്നൗ ഡയറക്ടർ ദിലീപ് ശുക്ളയുടെ നേതൃത്വത്തിൽ സ്വീകരിച്ചു. പ്രസ് ഇൻഫർമേഷൻ ബ്യൂറോയാണ് ഉത്തർ പ്രദേശിലേക്കുള്ള മാധ്യമ പര്യടനം സംഘടിപ്പിക്കുന്നത്. പിഐബി തിരുവനന്തപുരം സയറക്ടർ പാർവ്വതി, പിഐബി കൊച്ചി അസിസ്റ്റൻ്റ് ഡയറക്ടർ ലക്ഷ്മിപ്രിയ എസ്. എസ്. എന്നിവരാണ് സംഘത്തിന് നേതൃത്വം നൽകുന്നത്.
