കൊച്ചി: ലോക വനിതാ ക്രിക്കറ്റില് ഒരു ചെറു പുഞ്ചിരിയില് ഒളിപ്പിച്ചുവയ്ക്കാവുന്നതിലധികം വളര്ന്നു പന്തലിച്ചിരിക്കുകയാണ് ഭാരതത്തിന്റെ സ്മൃതി മന്ദാന. അതിന്റെ അളവു കോലായി കഴിഞ്ഞ ദിവസത്തെ ഏഷ്യാകപ്പ് പ്രകടനത്തിലൂടെ പിറന്ന നിരവധി റിക്കാര്ഡുകള് തിളങ്ങിനില്ക്കുന്നു.
പതിറ്റാണ്ടുകളായി നിലനില്ക്കുന്ന ഭാരത വനിതാ ക്രിക്കറ്റിന് ലോകത്തിന് മുന്നിലൊരു മേല്വിലാസമുണ്ടാക്കിയത് മിതാലി രാജിന്റെ നേതൃത്വത്തിലുള്ള വനിതാ ക്രിക്കറ്റ് തലമുറയായിരുന്നു. അവര്ക്കിടയില് കൗമാര താരമായി ടീമിലെത്തിയാണ് സ്മൃതിയുടെ തുടക്കം. ആ തുടക്കം ഏറ്റവും ഒടുവില് വന്നെത്തി നില്ക്കുന്നത് വനിതാ ക്രിക്കറ്റില് ഏറ്റവും കൂടുതല് റണ്സെന്ന മിതാലിയുടെ റിക്കാര്ഡ് ഭേദിച്ചുകൊണ്ടുള്ള പ്രകടനത്തില്. ഹോങ്കോങ്ങിനെതിരെ പിറന്ന ഏതാനും റിക്കാര്ഡുകളില് ഏറ്റവും തിളക്കമേറിയ നേട്ടം അതാണ്. മിതാലി രാജ് കുറിച്ച 10,868 റണ്സിനെയാണ് സ്മൃതി മറികടന്നത്. ഹോങ്കോങ്ങിനെതിരെ 124 റണ്സെടുത്തുകൊണ്ട് ഭാരത ഓപ്പണര് എത്തി നില്ക്കുന്നത് 10,880 റണ്സില്.
ഏറ്റവും കൂടുതല് സെഞ്ചുറികള് നേടുന്നതില് മറികടന്നത് ഓസ്ട്രേലിയക്കാരി മെഗ് ലാനിങ്ങിനെ. ടെസ്റ്റ്, ഏകദിന മത്സരങ്ങളില് നിന്നായി 34കാരിയായ ലാനിങ് നേടിയിരിക്കുന്നത് 17 സെഞ്ചുറികള്. ക്രിക്കറ്റിന്റെ മൂന്ന് ഫോര്മാറ്റുകളിലും കൂടി സ്മൃതി കുറിച്ച 18-ാം സെഞ്ചുറിയാണ് ഹോങ്കോങ്ങിനെതിരെ കണ്ടത്. ലാനിങ്ങിനെ അപേക്ഷിച്ച് സ്മൃതിയുടെ പ്രായം 30 ആണെന്നത് ശ്രദ്ധേയമാണ്.
ക്രിക്കറ്റിന്റെ മൂന്ന് ഫോര്മാറ്റുകളിലും സെഞ്ചുറി നേടുന്ന ഏക ഭാരത വനിതാ താരം എന്ന റിക്കാര്ഡ് നേരത്തെ തന്നെ സ്മൃതി സ്വന്തമാക്കിയിട്ടുണ്ട്. കൂടാതെ അതിവേഗം പതിനായിരം റണ്സ് തികയ്ക്കുന്ന വനിതാ താരമായ ശേഷമാണ് ഇപ്പോഴത്തെ റിക്കാര്ഡ് നേട്ടങ്ങളിലേക്കെത്തിയിരിക്കുന്നത്.
കഴിഞ്ഞ 13 വര്ഷമായി സ്മൃതി ഭാരത ടീമിനൊപ്പമുണ്ട്. 2013 ഏപ്രില് അഞ്ചിന് ബംഗ്ലാദേശിനെതിരായ ട്വന്റി20 മത്സരത്തിലൂടെയാണ് അന്താരാഷ്ട്ര ക്രിക്കറ്റില് അരങ്ങേറുന്നത്. അഞ്ച് ദിവസത്തിന് ശേഷം ബംഗ്ലാദേശിനെതിരെ ഏകദിനത്തിലും 2014 ആഗസ്ത് പത്തിന് ഇംഗ്ലണ്ടിനെതിരായ മത്സരത്തിലൂടെ ടെസ്റ്റിലും തുടക്കം കുറിച്ചു. ഏകദിനത്തില് 14 സെഞ്ചുറികള് നേടിയിട്ടുള്ള സ്മൃതി ടെസ്റ്റിലും ടി20യിലും രണ്ട് വീതം സെഞ്ചുറികള് നേടിയിട്ടുണ്ട്. 75 മത്സരങ്ങളില് അര്ദ്ധ സെഞ്ചുറി നേടി.
ഹോങ്കോങ്ങിനെതിരായ മത്സരത്തിലൂടെ സ്മൃതി ഒരു ഏഷ്യാ കപ്പ് റിക്കാര്ഡ് കൂടി സ്വന്തം പേരിലാക്കി. ഒരു മത്സരത്തില് ഏറ്റവുംകൂടുതല് റണ്സ് നേടുന്ന താരം എന്ന നേട്ടമാണ് സ്വന്തമാക്കിയത്. മറികടന്നത് 2024ലെ മലേഷ്യ ഏഷ്യാകപ്പില് ശ്രീലങ്കയുടെ ചമാരി അത്തപത്തു നേടിയ 119 റണ്സ്.
