നഴ്സിംഗ് സീറ്റ് വാഗ്ദാനം ചെയ്ത് ലക്ഷങ്ങള്‍ തട്ടിയെന്ന് പരാതി: നാഗമ്പടത്തെ സ്ഥാപനത്തിനെതിരെ കേസ്

കോട്ടയം: നഴ്സിംഗ് സീറ്റ് വാഗ്ദാനം ചെയ്ത് ലക്ഷങ്ങള്‍ തട്ടിയെന്ന പരാതിയില്‍ നാഗമ്പടത്തെ ‘വേ ടു സ്റ്റഡി’ എന്ന സ്ഥാപനത്തിനെതിരെ പൊലീസ് കേസെടുത്തു. ഹൈദരാബാദിലെ മെഡിക്കല്‍ കോളജില്‍ നഴ്സിംഗ് പഠനത്തിന് സീറ്റ് സംഘടിപ്പിച്ചു നല്‍കാമെന്ന് പറഞ്ഞ് പണം വാങ്ങിയെന്നാണ് 70 ഓളം വിദ്യാര്‍ത്ഥികള്‍ പരാതിപ്പെട്ടത്. ഒരു വിദ്യാര്‍ത്ഥിയില്‍ നിന്ന് 1.42 ലക്ഷം മുതല്‍ 2.42 ലക്ഷം രൂപ വരെ വാങ്ങിയിട്ടുണ്ട്. സീറ്റോ കൊടുത്ത പണമോ നല്‍കാതെ വന്നതോടെയാണ് വിദ്യാര്‍ത്ഥികളും രക്ഷിതാക്കളും ജില്ലാ പൊലീസ് മേധാവിക്ക് പരാതി നല്‍കിയത്. സര്‍ട്ടിഫിക്കറ്റുകളും സ്ഥാപനം പിടിച്ചുവച്ചിരിക്കയാണ്.
വിദ്യാര്‍ത്ഥികളും രക്ഷിതാക്കളും പ്രതിഷേധവുമായി സ്ഥാപനത്തിലെത്തിയതോടെ വാക്കേറ്റവും സംഘര്‍ഷവും ഉണ്ടായി. സംഭവത്തില്‍ പൊലീസ് അന്വേഷണം ആരംഭിച്ചു.