തിരുവനന്തപുരം:ട്രെയിനില് നിന്ന് അര്ധരാത്രി യാത്രക്കാരിയെ ടിടിഇ ഇറക്കിവിട്ട സംഭവത്തില് റെയില്വേ നഷ്ടപരിഹാരം നല്കണമെന്ന് മനുഷ്യാവകാശ കമ്മീഷന്. രണ്ട് ലക്ഷം രൂപയാണ് യാത്രക്കാരിക്ക് റെയില്വേ നഷ്ടപരിഹാരമായി നല്കേണ്ടത്.ഒരുമാസത്തിനകം തുക കൈമാറണം.
റെയില്വേ ആക്റ്റിലെ സെക്ഷന് 139 പ്രകാരം ഒറ്റയ്ക്ക് യാത്ര ചെയ്യുകയായിരുന്ന സ്ത്രീയെ അര്ധരാത്രി ട്രെയിനില് നിന്നും ഇറക്കിവിട്ട നടപടി തെറ്റാണെന്ന് ജസ്റ്റിസ് അലക്സാണ്ടര് തോമസ് ഉത്തരവില് ചൂണ്ടിക്കാട്ടി. മാതാപിതാക്കളില്ലാത്ത ഒറ്റയ്ക്ക് ജീവിക്കുന്ന പരാതിക്കാരിയോട് റെയില്വേ കാണിച്ചത് നീതിപൂര്വകമായ നടപടിയല്ല. അന്തസോടെ ജീവിക്കുക എന്ന ഭരണഘടനാവകാശവും മനുഷ്യാവകാശവും ലംഘിക്കപ്പെട്ടുവെന്നും ഉത്തരവില് പറയുന്നു.
2023 ജൂലായ് 30 ന് 16348 നമ്പര് ട്രെയിനില് വടക്കാഞ്ചേരിയില് നിന്നും തിരുവനന്തപുരത്തേക്ക് ടിക്കറ്റ് റിസര്വ് ചെയ്ത യാത്രക്കാരിക്കാണ് ദുരനുഭവം. എസ് 4 കംപാര്ട്ട്മെന്റില് 41-ാം നമ്പര് ബര്ത്ത് അനുവദിക്കപ്പെട്ട യാത്രക്കാരി ബര്ത്തിലെത്തുമ്പോള് അത് മറ്റൊരാള്ക്ക് അനുവദിച്ചതായി കണ്ടെത്തി. ടി ടി ഇയോട് പരാതിപ്പെട്ടപ്പോള് തന്റെ ടിക്കറ്റ് വെബില് കാന്സല് ചെയ്തിട്ടുള്ളതായി പറഞ്ഞു.തിരുവനന്തപുരം റെയില് വേ സ്റ്റേഷനില് നിന്നും നേരിട്ട് എടുത്ത ടിക്കറ്റ് ഓണ്ലൈനായി കാന്സല് ചെയ്യുന്നത് എങ്ങനെയാണെന്ന് ചോദിച്ചെങ്കിലും മറുപടി കിട്ടിയില്ലെന്ന് യാത്രക്കാരി പറയുന്നു.
