ലഖ്നൗ: ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് പൈപ്പ് വലിക്കുന്ന വീഡിയോ പ്രചരിപ്പിച്ച് അഖിലേഷ് യാദവിന്റെ സമാജ് വാദി പാര്‍ട്ടി. എങ്ങിനെയെങ്കിലും 2027ലെ ഉത്തര്‍പ്രദേശ് നിയമസഭാ തെരഞ്ഞെടുപ്പില്‍ വിജയിക്കാനായി എത്ര തരംതാണ കളികളും കളിക്കുകയാണ് സമാജ് വാദി പാര്‍ട്ടി. അതിന്റെ ഒടുവിലത്തെ ഉദാഹരണമാണ് യോഗി ആദിത്യ നാഥ് പൈപ്പ് വലിക്കുന്ന എഐ ഡീപ് ഫേക്ക് വീഡിയോ.
ഈ വ്യാജവീഡിയോ എഐ ഡീപ് ഫേക്ക് വീഡിയോ ആണെന്നറിഞ്ഞിട്ടും സമാജ് വാദി പാര്‍ട്ടി നേതാവ് അഖിലേഷ് യാദവ് പങ്കുവെച്ചിരുന്നു. ഇതിനെതിരെ ബിജെപി നേതാക്കളും ഹിന്ദു സംഘടനകളും ശക്തമായ വിമര്‍ശനം ഉയര്‍ത്തുകയാണ്.
ഇന്ത്യയുടെ കാവി പാരമ്പര്യത്തിനും സാധുക്കളുടെ ജീവിതത്തിനും ഗോരഖ് നാഥ് ആശ്രമ പാരമ്പര്യത്തിനും കളങ്കമേല്‍പിക്കുന്ന ഒന്നാണ് ഈ വീഡിയോ എന്നും വിമര്‍ശനം ഉയരുകയാണ്. യോഗി ആദിത്യനാഥ് ഗോരഖ് നാഥ് ആശ്രമപരമ്പരയില്‍പ്പെട്ട യോഗിയാണ്. പിന്നീട് ഒരു സവിശേഷ സാഹചര്യത്തില്‍ അദ്ദേഹത്തിന് ഉത്തര്‍പ്രദേശ് മുഖ്യമന്ത്രിസ്ഥാനം ഏറ്റെടുക്കേണ്ടിവരികയായിരുന്നു.
