കൊച്ചി: സംസ്ഥാനത്തെ മൂന്ന് സര്ക്കാര് മാനസികാരോഗ്യ കേന്ദ്രങ്ങള് നവീകരിക്കാന് നേരത്തെ നല്കിയ നിര്ദേശങ്ങള് പാലിക്കാതിരുന്നതിന് സംസ്ഥാന സര്ക്കാരിനെതിരെ ഹൈക്കോടതിയുടെ രൂക്ഷ വിമര്ശനം. ഇതൊരു ‘അങ്ങേയറ്റം ലജ്ജാകരമായ’ കാര്യമാണെന്ന് കോടതി വാക്കാല് നിരീക്ഷിച്ചു.
ജസ്റ്റിസ് ദേവന് രാമചന്ദ്രന്, ജസ്റ്റിസ് ബസന്ത് ബാലാജി എന്നിവരടങ്ങുന്ന ബെഞ്ച ഹര്ജികള് വ്യാഴാഴ്ചത്തേക്ക് മാറ്റി. വിശദീകരണം നല്കാന് അഡ്വക്കേറ്റ് ജനറലിനോട് ഹാജരാകാന് ആവശ്യപ്പെട്ടു.
തിരുവനന്തപുരം, തൃശൂര്, കോഴിക്കോട് എന്നിവിടങ്ങളിലെ മൂന്ന് കേന്ദ്രങ്ങളും നേരത്തെ സന്ദര്ശിച്ച ബെഞ്ച്, ആരോഗ്യ-സാമൂഹ്യക്ഷേമ വകുപ്പ് സെക്രട്ടറിമാരോടും സാമൂഹ്യനീതി വകുപ്പ് സെക്രട്ടറിയോടും സ്വീകരിച്ചതോ സ്വീകരിക്കേണ്ടതോ ആയ പരിഹാര നടപടികളെക്കുറിച്ച് വിശദമായ റിപ്പോര്ട്ട് സമര്പ്പിക്കാന് നിര്ദേശിച്ചിരുന്നു. എന്നാല്, ഇന്നലെ മറുപടികള് അപൂര്ണമാണെന്ന് കണ്ടെത്തിയ സാഹചര്യത്തിലാണ് സര്ക്കാരിന്റെ അനാസ്ഥയെ വിമര്ശിച്ചത്.
ഈ മൂന്ന് മാനസികാരോഗ്യ കേന്ദ്രങ്ങളിലെയും അന്തേവാസികളുടെ ദയനീയമായ ജീവിതസാഹചര്യങ്ങളില് കോടതി കടുത്ത ആശങ്ക രേഖപ്പെടുത്തി. സമയം നല്കിയാല് സര്ക്കാര് ഉചിതമായ നടപടി സ്വീകരിക്കുമെന്ന് കരുതിയാണ് നേരത്തേ കൂടുതല് കടുത്ത പരാമര്ശങ്ങള് ഒഴിവാക്കിയതെന്നും വ്യക്തമാക്കി.
