കോട്ടയം: അഴിമതിക്കാരായ ഉദ്യോഗസ്ഥര്ക്കെതിരെ വിട്ടുവീഴ്ചയില്ലാത്ത നടപടിയുണ്ടാകുമെന്ന് എക്സൈസ് വകുപ്പ് മന്ത്രി
എം ലിജു. എക്സൈസ് ഡെപ്യൂട്ടി കമ്മീഷണര് ബാറുകളില് നിന്ന് പണപ്പിരിവ് നടത്തിയ സംഭവത്തില് പ്രതികരിക്കുകയായിരുന്നു മന്ത്രി. എത്ര ഉന്നതനായാലും കുറ്റം ചെയ്താല് നടപടി നേരിടേണ്ടി വരും. അതേസമയം, സത്യസന്ധരായ ഉദ്യോഗസ്ഥര്ക്ക് സര്ക്കാര് പൂര്ണ്ണ സംരക്ഷണം നല്കുമെന്നും മന്ത്രി പറഞ്ഞു.
കോട്ടയം ഡെപ്യൂട്ടി കമ്മീഷണര് അശോക് കുമാര് നേരിട്ടും ഏജന്റുമാര് മുഖേനയും പണം കൈപ്പറ്റുന്നുവെന്ന വിവരത്തെ തുടര്ന്ന് മൂന്ന് ദിവസം രഹസ്യ അന്വേഷണം നടത്തിയ ശേഷമായിരുന്നു എക്സൈസ് കമ്മീഷണര് സാംബശിവറാവുവും വിജിലന്സ് എസ്.പി കൃഷ്ണകുമാറും നേരിട്ടെത്തി പരിശോധന നടത്തിയത്. ചങ്ങനാശ്ശേരിയിലെ ഒരു ബാറുടമ മുഖേനയാണ് മറ്റ് ബാറുകളില് നിന്ന് പണം ശേഖരിച്ച് ഡെപ്യൂട്ടി കമ്മീഷണര്ക്ക് കൈമാറിയിരുന്നത്. സി.സി.ടി.വി ദൃശ്യങ്ങളും ഡിജിറ്റല് തെളിവുകളും മാസപ്പടി വിവരങ്ങളടങ്ങിയ ഡയറിയും മിന്നല് പരിശോധനയില് പിടിച്ചെടുത്തു.
