കൊച്ചി: നിവിൻ പോളിയെ നായകനാക്കി ഗിരീഷ് എ.ഡി. സംവിധാനം ചെയ്ത ‘ബെത്ലഹേം കുടുംബ യൂണിറ്റ്’ തിയറ്ററുകളിൽ വൻ വിജയം നേടി മുന്നേറുമ്പോൾ, സോഷ്യൽ മീഡിയയിൽ തരംഗമാകുന്നത് ചിത്രത്തിലെ ഒരു പഴയ ഗാനം. 30 വർഷങ്ങൾക്ക് മുൻപ് റിലീസാകാതെ പോയ ‘അന്ന’ എന്ന സിനിമയ്ക്ക് വേണ്ടി ഔസേപ്പച്ചൻ സംഗീതം നൽകി ഷിബു ചക്രവർത്തി എഴുതിയ ‘യവന കഥയിൽ നിന്നുവന്ന ഇടയ കന്യകേ…’ എന്ന ഗാനമാണ് സിനിമയിലൂടെ വീണ്ടും പുനർജനിച്ചിരിക്കുന്നത്.
ആദ്യ ഷോ കഴിഞ്ഞതിന് പിന്നാലെ തന്നെ പ്രേക്ഷകർ ഏറ്റെടുത്ത ഈ ഗാനം ഇപ്പോൾ ഇൻസ്റ്റാഗ്രാം റീൽസുകളിലും സോഷ്യൽ മീഡിയ പ്ലാറ്റ്ഫോമുകളിലും തരംഗമായി മാറിയിരിക്കുകയാണ്. സിനിമയിൽ നിവിൻ പോളി അവതരിപ്പിക്കുന്ന ‘ജസ്റ്റിൻ’ എന്ന കഥാപാത്രത്തിലൂടെയാണ് ഈ ഗാനം ചിത്രത്തിൽ എത്തുന്നത്.
പാട്ടിന് ലഭിച്ച അപ്രതീക്ഷിത വരവേൽപ്പിൽ സന്തോഷം പങ്കുവെച്ച് സംഗീത സംവിധായകൻ ഔസേപ്പച്ചനും ഗാനരചയിതാവ് ഷിബു ചക്രവർത്തിയും രംഗത്തെത്തി. “ഹൃദയത്തിൽ നിന്ന് കുഴിച്ചുമൂടപ്പെട്ട പാട്ടിന് ഇങ്ങനെ ഒരു ഉയർത്തെഴുന്നേൽപ്പ് ഉണ്ടായതിൽ അതീവ സന്തോഷം,” എന്ന് ഔസേപ്പച്ചൻ സോഷ്യൽ മീഡിയയിൽ കുറിച്ചു.
1995-ൽ അരവിന്ദ് സ്വാമിയെ നായകനാക്കി പ്ലാൻ ചെയ്ത സിനിമ മുടങ്ങിപ്പോയെങ്കിലും അന്ന് കെ.ജെ. യേശുദാസും കെ.എസ്. ചിത്രയും ചേർന്ന് പാടിയ ഈ ഗാനത്തിന്റെ കാസറ്റുകൾ വൻതോതിൽ വിറ്റഴിച്ചിരുന്നതായി ഷിബു ചക്രവർത്തി പറഞ്ഞു. ഫോണിലൂടെയാണ് ഈ ഗാനത്തിന്റെ ട്യൂണും വരികളും പെട്ടെന്ന് കമ്പോസ് ചെയ്തതെന്നും, ഒരു കാവ്യനീതി പോലെ വർഷങ്ങൾക്ക് ശേഷം പാട്ട് വീണ്ടും ജനപ്രിയമായതിൽ വലിയ സന്തോഷമുണ്ടെന്നും അദ്ദേഹം കൂട്ടിച്ചേർത്തു.
