മലപ്പുറം : പുറത്തൂര് പടിഞ്ഞാറേക്കര തിരൂര്പ്പുഴയില് ചാക്കില്ക്കെട്ടിയ നിലയില് യുവതിയുടെ മൃതദേഹം കണ്ടെത്തിയ സംഭവത്തില് ഭര്ത്താവ് പിടിയില്. 37കാരിയായ ഫൗസിയ കൊല്ലപ്പെട്ട കേസില് അമ്പലപ്പടി അണ്ടിപ്പാട്ടില് ഹുസൈനാണ് പിടിയിലായത്. പ്രതിയെ തിരിച്ചറിഞ്ഞ ഒരാള് നല്കിയ വിവരത്തിന്റെ അടിസ്ഥാനത്തില് തിരൂരില് നിന്നാണ് ഇയാളെ പിടികൂടിയത്.
കഴിഞ്ഞ ദിവസം ഉച്ചയോടെയാണ് യുവതിയുടെ മൃതദേഹം ചാക്കില് കെട്ടി താഴ്ത്തിയ നിലയില് കണ്ടെത്തിയത്. ബോട്ട് കടലിലേക്കിറക്കി നങ്കുരം ഉയര്ത്തുമ്പോള് ഒരു ചാക്ക് കുരുങ്ങുകയായിരുന്നു. തുടര്ന്ന് പൊലീസ് നടത്തിയ പരിശോധനയില് ചാക്കില് ഫൗസിയയുടെ മൃതദേഹമാണെന്ന് വ്യക്തമായി.
വലയില് മീന് കുടുങ്ങിയിട്ടുണ്ടെന്നും അതെടുക്കാനെന്നും പറഞ്ഞ് വ്യാഴാഴ്ച പുലര്ച്ചെ ഉറക്കത്തില്നിന്ന് ഫൗസിയയെ വിളിച്ചുണര്ത്തി കൊണ്ടുപോവുകയായിരുന്നെന്ന് മക്കള് പൊലീസിനു മൊഴി നല്കിയിരുന്നു. പിന്നീട് ഇരുവരെയും കാണാതായി.
