ന്യൂദല്ഹി: കരോള് ബാഗില് എസ്യുവി കാറിന്റെ ചില്ല് തകര്ത്ത് ജൂവലറി ഉടമയുടെ രണ്ട് കോടി രൂപ വിലവരുന്ന സ്വര്ണാഭരണങ്ങള് കൊള്ളയടിച്ചു. ബൈക്കില് എത്തിയ രണ്ട് പേര് കാറിന്റെ ചില്ല് തകര്ത്ത് മൂന്ന് ബാഗുകളിലുണ്ടായിരുന്ന ആഭരണങ്ങള് കവരുകയായിരുന്നു. മൂന്ന് പേരെ പോലീസ് കസ്റ്റഡിയിലെടുത്തു. കഴിഞ്ഞ ദിവസം വൈകിട്ട് അഞ്ചരയോടെയാണ് സംഭവം. എസ്കെജി കുന്ദന് ക്രാഫ്റ്റ്സ് ആഭരണ ബിസിനസ് ഉടമ കനയ്യ ലാലിന്റെ ആഭരണങ്ങളാണ് കൊള്ളയടിച്ചത്.
കനയ്യ ലാലും മകന് ധ്രുവ് സോണിയും ഒരു സ്റ്റാഫിനൊപ്പം ബിസിനസ് ആവശ്യത്തിനായി ദല്ഹിയില് എത്തിയതായിരുന്നു. ഇവരുടെ കൈവശം മൂന്ന് ബാക്ക്പാക്കുകളും ഒരു സ്യൂട്ട്കേസുമാണ് ഉണ്ടായിരുന്നത്. ബാക്ക്പാക്കുകളില് സ്വര്ണ- വജ്ര ആഭരണങ്ങള്, ലാപ്ടോപ്, ആധാര് കാര്ഡ് എന്നിവയും സ്യൂട്ട്കേസില് വസ്ത്രങ്ങളുമായിരുന്നു. 19ന് വൈകുന്നേരം അഞ്ചരയോടെ ആര്യ സമാജ് റോഡില് കാനറ ബാങ്ക് ശാഖയ്ക്ക് എതിര്വശത്ത് പാര്ക്ക് ചെയ്തശേഷം കനയ്യലാലും മകനും ജീവനക്കാരനും ബാഗുകളും സ്യൂട്ട്കേസും വാഹനത്തിനുള്ളില് വച്ച് അടുത്തുള്ള റസ്റ്റോറന്റിലേക്ക് പോയി. രാത്രി 7.15ഓടെ തിരിച്ചെത്തിയപ്പോള് വാഹനത്തിന്റെ പിന്വശത്തെ ചില്ല് തകര്ത്ത് ബാഗുകള് കൊള്ളയടിച്ചതായി കണ്ടെത്തി. തുടര്ന്ന് പോലീസില് പരാതി നല്കുകയായിരുന്നു.
