ന്യൂദല്‍ഹി: ജനങ്ങളുടെ ജീവിതം മെച്ചപ്പെടുത്തുന്നതിന് ബഹിരാകാശ സാങ്കേതികവിദ്യകളില്‍ കൂടുതല്‍ ഗവേഷണം ഉണ്ടാകണമെന്ന് പ്രധാനമന്ത്രി നരേന്ദ്ര മോദി. ബഹിരാകാശ മേഖലയിലെ കമ്പനികളുമായി മറ്റ് മേഖലകളില്‍ പ്രവര്‍ത്തിക്കുന്ന കമ്പനികള്‍ കൂടുതല്‍ സഹകരിക്കണമെന്നും അദ്ദേഹം പറഞ്ഞു. ബഹിരാകാശ സ്റ്റാര്‍ട്ടപ്പുകളുടെ സിഇഒമാരുമായും സ്ഥാപകരുമായും ഇന്നലെ രാവിലെ സേവാ തീര്‍ത്ഥത്തില്‍ സംവദിക്കുകയായിരുന്നു പ്രധാനമന്ത്രി.
കാര്‍ഷിക മേഖലയുമായി പ്രവര്‍ത്തിക്കുന്ന ബഹിരാകാശ സാങ്കേതിക കമ്പനികള്‍ക്ക് കാര്‍ഷിക സര്‍വകലാശാലകളുമായി സഹകരിച്ച് കാര്‍ഷിക ഉത്പാദനം പരമാവധിയാക്കുന്നതിനും ബഹിരാകാശ മാലിന്യങ്ങളുമായി ബന്ധപ്പെട്ട് പ്രവര്‍ത്തിക്കുന്ന കമ്പനികള്‍ക്ക് പരിസ്ഥിതി സംഘടനകളുമായി സഹകരിച്ച് പ്രവര്‍ത്തിക്കുന്നതിനും സാധിക്കണമെന്നും പ്രധാനമന്ത്രി പറഞ്ഞു.
ബഹിരാകാശ മേഖലയെ സ്വകാര്യ പങ്കാളിത്തത്തിന് തുറന്നുകൊടുക്കാനുള്ള തീരുമാനത്തെ സിഇഒമാര്‍ അഭിനന്ദിച്ചു. ബഹിരാകാശ മേഖലയില്‍ പ്രവര്‍ത്തിക്കുന്ന 20 സ്റ്റാര്‍ട്ടപ്പുകളുടെ സിഇഒമാരും സ്ഥാപകരും പങ്കെടുത്തു.
