കോഴിക്കോട്: സിഎംആര്‍എല്‍-എക്സാലോജിക് സാമ്പത്തിക ഇടപാട് കേസുമായി ബന്ധപ്പെട്ട് ടി. വീണയുടെ ഉടമസ്ഥതയിലുള്ള ലേക്കര്‍ ഇന്ത്യ കോര്‍പ്പ് എന്ന സ്ഥാപനത്തിന് തദ്ദേശ സ്വയംഭരണ സ്ഥാപനത്തിന്റെ അടിസ്ഥാന ലൈസന്‍സ് പോലുമില്ല. കോഴിക്കോട് ഒളവണ്ണ പഞ്ചായത്തിലെ പന്തീരങ്കാവില്‍ ഒറ്റമുറിയില്‍ രേഖപ്പെടുത്തിയിരിക്കുന്ന സ്ഥാപനത്തിന് പഞ്ചായത്ത് ലൈസന്‍സ് അനുവദിച്ചിരുന്നില്ലെന്ന് ഒളവണ്ണ ഗ്രാമപഞ്ചായത്ത് സെക്രട്ടറി സ്ഥിരീകരിച്ചു.
ലൈസന്‍സിനായി അനീസ് എന്ന വ്യക്തി അപേക്ഷിച്ചിരുന്നെങ്കിലും വാടകക്കരാറിലെ അവ്യക്തതകള്‍ കാരണമാണ് നിരസിച്ചതെന്ന് പഞ്ചായത്ത് അധികൃതര്‍ വ്യക്തമാക്കി. മെഡിക്കല്‍ ഉപകരണങ്ങളുടെ വില്‍പനയ്‌ക്കായി രജിസ്റ്റര്‍ ചെയ്തിട്ടുള്ള ഈ സ്ഥാപനം 2023 മുതല്‍ മാസം 3250 രൂപ മാത്രം വാടകയുള്ള ഒരു ചെറിയ മുറിയുടെ വിലാസത്തിലാണ് പ്രവര്‍ത്തിക്കുന്നത്. എന്നാല്‍ ഈ കെട്ടിടമുറി സാധാരണയായി തുറക്കാറില്ലെന്നും, ഒരു ഓഫീസ് പ്രവര്‍ത്തിക്കുന്ന ലക്ഷണങ്ങളില്ലെന്നും സമീപവാസികളും കെട്ടിട ഉടമയും സാക്ഷ്യപ്പെടുത്തുന്നു.
അടിസ്ഥാന ലൈസന്‍സ് പോലുമില്ലാതെയും കൃത്യമായ പ്രവര്‍ത്തനങ്ങളില്ലാതെയും കാണപ്പെടുന്ന ഇത് ഒരു കടലാസ് (ഷെല്‍) കമ്പനിയാണോയെന്നാണ് എന്‍ഫോഴ്സ്മെന്റ് ഡയറക്ടറേറ്റ് അന്വേഷിക്കുന്നത്.
വിദേശത്തേക്ക് പണം അയച്ചതുമായി ബന്ധപ്പെട്ട് കണ്ടെത്തിയ വിവരങ്ങളുടെ അടിസ്ഥാനത്തില്‍ ഫോറിന്‍ എക്‌സ്‌ചേഞ്ച് മാനേജ്‌മെന്റ് ആക്ട് (ഫെമ) ചട്ടലംഘനത്തിനും, ഹവാല ചാനലുകള്‍ വഴി സാമ്പത്തിക ഇടപാടുകള്‍ നടത്തിയതിനും പിഎംഎല്‍എ നിയമപ്രകാരം മറ്റൊരു കേസ് കൂടി രജിസ്റ്റര്‍ ചെയ്യുന്നതിനെ കുറിച്ചും അന്വേഷണസംഘം നിയമോപദേശം തേടി വരികയാണ്.
