കൊച്ചി: വിദേശ പണമിടപാടില്‍ എക്‌സാലോജിക് എംഡിയും പ്രതിപക്ഷ നേതാവ് പിണറായി വിജയന്റെ മകളുമായ വീണ ടിയെ എന്‍ഫോഴ്‌സ്‌മെന്‍റി ഡയറക്‌ടറേറ്റ് ചോദ്യം ചെയ്യും. ഇതിനായി ഉടന്‍ സമന്‍സ് അയയ്‌ക്കുമെന്നറിയുന്നു.
സിഎംആര്‍എല്‍ എക്സാലോജിക്ക് സാമ്പത്തിക ഇടപാട് കേസില്‍ പുതിയ കണ്ടെത്തലുകളുടെ പശ്ചാത്തലത്തില്‍ വീണയ്‌ക്കെതിരെ പുതിയ കേസ് രജിസ്റ്റര്‍ ചെയ്യും. വീണ 85 ലക്ഷം ദുബായിലേക്ക് കൈമാറിയതിന് പുറമേ 20 കോടിയുടെ കണക്കുകള്‍ ഡയറിയില്‍ ഉണ്ടെന്നും ഇ ഡി വ്യക്തമാക്കിയിരുന്നു. വീണയുടെ വിദേശ ഇടപാടുകളില്‍ ദുരൂഹതയുണ്ടെന്ന നിഗമനത്തിലാണ് ഫെമ നിയമ പ്രകാരം കേസ് രജിസ്റ്റര്‍ ചെയ്യാനുള്ള തീരുമാനം. ഹവാല ഇടപാടിലൂടെയാണ് പണം കടത്തിയതെന്ന് ആരോപണമുണ്ട്. പണമിടപാടുമായി ബന്ധപ്പെട്ട ആളുകളുടെ പേരുകള്‍, കൈകാര്യം ചെയ്ത തുക, ചെലവുകള്‍ എന്നിവ വീണ ടി സ്വന്തം കൈപ്പടയില്‍ എഴുതിയ കുറിപ്പും കണ്ടെത്തിയിരുന്നു. അതുപോലെ കോഴിക്കോട് 2023ല്‍ ആരംഭിച്ച ലേക്കര്‍ ഇന്ത്യ കോര്‍പറേഷന്‍ എന്ന മറ്റൊരു കമ്പനിയുടെ വിവരങ്ങള്‍ കൂടി പുറത്തുവന്നിട്ടുണ്ട്. രജിസ്റ്റര്‍ ചെയ്ത സ്ഥാപനമാണെങ്കിലും ഇതിന്റെ സാന്നിധ്യം അത്ര പ്രകടമായിരുന്നില്ല. ഇതേക്കുറിച്ചെല്ലാം ചോദ്യം ചെയ്യലില്‍ ഇഡി ചോദിച്ചറിയുമെന്നാണ് കരുതപ്പെടുന്നത്.
മെയ് 27ന് വീണയുടെ തിരുവനന്തപുരത്തെ വാടക വീട്ടില്‍ നടത്തിയ പരിശോധനയില്‍ പിടിച്ചെടുത്ത ഡയറിയില്‍ നിന്ന് സാമ്പത്തിക ഇടപാടുകളുടെ വിവരങ്ങള്‍ ഇഡിയ്‌ക്ക് ലഭിച്ചിരുന്നു.
