ചെന്നൈ: തമിഴ്നാട്ടിലെ 234 നിയമസഭാ അംഗങ്ങൾക്കും (എംഎൽഎ) പുതിയ സർക്കാർ കാറുകൾ നൽകുമെന്ന് മുഖ്യമന്ത്രി വിജയ് പ്രഖ്യാപിച്ചു. ഇന്ധനം, അറ്റകുറ്റപ്പണി, ഡ്രൈവർ എന്നിവയ്ക്കായി ഓരോ നിയമസഭാംഗത്തിനും പ്രതിമാസം 75,000 രൂപ വാഹന അലവൻസും ഓഫീസ് അസിസ്റ്റന്റിനെ നിയമിക്കുന്നതിന് പ്രതിമാസം 25,000രൂപയും ലഭിക്കും.
എംഎൽഎമാർക്ക് അവരുടെ മണ്ഡലവുമായി ബന്ധപ്പെട്ട ജോലികൾ ചെയ്യാൻ ഈ വാഹനം സഹായിക്കുമെന്ന് മുഖ്യമന്ത്രി പറഞ്ഞു. “ജനങ്ങളുടെ പ്രശ്നങ്ങൾ പരിഹരിക്കുന്നതിന് എംഎൽഎമാർ അവരുടെ മണ്ഡലങ്ങളിൽ ഇടയ്ക്കിടെ യാത്ര ചെയ്യേണ്ടതുണ്ട്. സർക്കാർ വാഹനം സുതാര്യവും അഴിമതിരഹിതവുമായ ഭരണം ഉറപ്പാക്കും,” കാറുകൾ വാങ്ങുന്നതിനുള്ള ചെലവുകളെ ന്യായീകരിച്ചുകൊണ്ട് മുഖ്യമന്ത്രി നിയമസഭയിൽ പ്രഖ്യാപിച്ചു.
എംഎൽഎമാർക്ക് ആവശ്യമായ അടിസ്ഥാന സൗകര്യങ്ങളുടെ അഭാവം ചൂണ്ടിക്കാട്ടി വിസികെ എംഎൽഎ ജ്യോതിമണി നിയമസഭയിൽ കാറുകൾ ഉൾപ്പെടെയുള്ള സൗകര്യങ്ങൾ അനുവദിക്കണമെന്ന് ആവശ്യപ്പെട്ടിരുന്നു. ഇതിനുപിന്നാലെയാണ് വിജയ് സർക്കാരിന്റെ പുതിയ പ്രഖ്യാപനം. ആകെ 234 എംഎൽഎമാർ ആണുള്ളത്. ഇവർക്ക് ഒരു ലക്ഷം രൂപയിൽ അധികം ശമ്പളം ഉണ്ട്. ഇതിനുപുറമെയാണ് പുതിയ പ്രഖ്യാപനം. വിജയ്യുടെ പ്രഖ്യാപനത്തിന് പിന്നാലെ ടിവികെ എംഎൽഎ സിന്ധു പാട്ട് പാടി വിജയ്ക്ക് നന്ദി അറിയിച്ചു.
നിലവിലെ നിയമസഭയിൽ ആദ്യമായി തിരഞ്ഞെടുക്കപ്പെട്ട നിരവധി എംഎൽഎമാരുണ്ടെന്നും അവർ എളിയ പശ്ചാത്തലത്തിൽ നിന്നുള്ളവരാണെന്നും തമിഴ്നാട് സർക്കാർ കൂട്ടിച്ചേർത്തു. ജനപ്രതിനിധി എന്ന നിലയിൽ തങ്ങളുടെ കടമകൾ നിർവഹിക്കാൻ അവർക്ക് ഒരു കാർ ആവശ്യമാണെന്നും വിജയ് കൂട്ടിച്ചേർത്തു. തെരഞ്ഞെടുക്കപ്പെട്ട പ്രതിനിധികളുടെ ആരോഗ്യ പരിരക്ഷ 5 ലക്ഷം രൂപയിൽ നിന്ന് 25 ലക്ഷം രൂപയായി ഉയർത്തുമെന്നും വിജയ് സർക്കാർ പ്രഖ്യാപിച്ചു.
