കൊച്ചി:കാലടി സംസ്കൃത സര്വകലാശാലയില് വിസിക്കെതിരെ അതിക്രമം നടത്തിയതിയന് പൊലീസ് അറസ്റ്റ് ചെയ്ത നാല് എസ്എഫ്ഐ പ്രവര്ത്തകരെ റിമാന്ഡ് ചെയ്തു. എസ് എഫ് ഐ സംസ്ഥാന സമിതി അംഗം മെബിന് ജോസ്, സര്വകലാശാലയിലെ എസ്എഫ്ഐ പ്രവര്ത്തകരായ ബേസില്, യദു, ബിനീഷ് എന്നിവരാണ് റിമാന്ഡിലായത്.വിദ്യാര്ത്ഥികള് കയ്യേറ്റം ചെയ്തു എന്ന വി സി ഡോ സിസ തോമസിന്റെ പരാതിയില് രജിസ്റ്റര് ചെയ്ത കേസിലാണ് നടപടി. സമരവുമായി ബന്ധപ്പെട്ട ആദ്യകേസില് വിദ്യാര്ത്ഥികള്ക്ക് ജാമ്യം ലഭിച്ചിരുന്നു.
കാലടി സംസ്കൃത സര്വകലാശാലയിലെ ഒരു സംഘം വിദ്യാര്ത്ഥികള് ദേഹോപദ്രവം ഏല്പ്പിക്കുകയും കൈയേറ്റം ചെയ്യുകയും മാനസികമായി പീഡിപ്പിക്കുകയും ചെയ്തുവെന്ന് കാട്ടി വൈസ് ചാന്സലര് സിസ തോമസ് മുഖ്യമന്ത്രിക്കും ആഭ്യന്തര മന്ത്രിക്കും പരാതി നല്കിയിരുന്നു.ഔദ്യോഗിക കൃത്യ നിര്വഹണം തടസപ്പെടുത്തുകയും ഔദ്യോഗിക വാഹനത്തിന് കേടുപാട് വരുത്തുകയും തന്നോടൊപ്പം ഉണ്ടായിരുന്ന പേഴ്സണല് സ്റ്റാഫും സിന്ഡിക്കേറ്റ് അംഗങ്ങളും ആക്രമിക്കപ്പെട്ടുവെന്നും പരാതിയില് പറയുന്നുണ്ട്.
സിന്ഡിക്കേറ്റ് യോഗത്തില് പങ്കെടുക്കാന് സര്വകലാശാലയില് എത്തിയതായിരുന്നു വിസി സിസ തോമസ്.യോഗം കഴിഞ്ഞ് മടങ്ങവെയാണ് വിദ്യാര്ത്ഥികള് ലിഫ്റ്റിന് മുന്നിലും സര്വകലാശാല ഗേറ്റിന് സമീപത്തും വച്ച് വിസിയെ തടഞ്ഞ് കയ്യേറ്റം ചെയ്തത്. കഴിഞ്ഞ ദിവസം ഡോ സിസ തോമസ് ഗവര്ണര് രാജേന്ദ്ര വിശ്വനാഥ് ആര്ലേക്കറെ സന്ദര്ശിച്ച ശേഷമാണ് പരാതി നല്കാന് തീരുമാനിച്ചത്.
