തൃശൂര്: കേരള സാങ്കേതികസംസ്കൃത സര്വകലാശാല വൈസ് ചാന്സലറെ അപായപ്പെടുത്താനും കേരളത്തിലെ ഉന്നത വിദ്യാഭ്യാസ മേഖലയില് അരാജകത്വം സൃഷ്ടിക്കാനുമുള്ള ഇടതു വിദ്യാര്ത്ഥി സംഘടനകളുടെ നീക്കങ്ങളെ അക്കാദമിക സമൂഹം ഒറ്റക്കെട്ടായി ചെറുത്തുതോല്പ്പിക്കുമെന്ന് എബിആര്എസ്എം കെ.ടി.യു ഭാരവാഹികള് പ്രസ്താവനയില് അറിയിച്ചു.
ഇടതു ക്രിമിനലുകള്ക്ക് വേണ്ടി വിടുപണി ചെയ്യുന്ന ചില സിന്ഡിക്കേറ്റ് അംഗങ്ങളും ജീവനക്കാരും, രാജ്യവിരുദ്ധ ശക്തികള്ക്കൊപ്പം നില്ക്കുന്ന ചില അദ്ധ്യാപകരുമാണ് കേരളത്തിലെ ഉന്നത വിദ്യാഭ്യാസ മേഖലയില് അരാജകത്വം സൃഷ്ടിക്കാന് ശ്രമിക്കുന്നതെന്ന് ഭാരവാഹികള് ആരോപിച്ചു. സര്വകലാശാലകളുടെ അക്കാദമിക സ്വാതന്ത്ര്യവും ഭരണപരമായ അച്ചടക്കവും തകര്ക്കാനുള്ള ഇത്തരം നീക്കങ്ങള് അനുവദിക്കാനാകില്ലെന്നും അവര് വ്യക്തമാക്കി. കേരളത്തിന്റെ ഉന്നത വിദ്യാഭ്യാസ മേഖലയെ തകര്ക്കുകയും വിദ്യാര്ത്ഥികളെ കേരളത്തിന് പുറത്തേക്ക് പോകാന് നിര്ബന്ധിതരാക്കുകയും ചെയ്യുന്നതിലൂടെ അന്യസംസ്ഥാനങ്ങളിലെ വിദ്യാഭ്യാസ ലോബികള്ക്ക് നേട്ടമുണ്ടാക്കുകയാണ് എസ്എഫ്ഐയുടെ ലക്ഷ്യമെന്ന ആരോപണം ഗൗരവമായി പരിശോധിക്കേണ്ടതാണ്. സര്വകലാശാലകളിലും ഉന്നത വിദ്യാഭ്യാസ സ്ഥാപനങ്ങളിലും അക്കാദമിക സ്വാതന്ത്ര്യവും സമാധാനപരമായ അന്തരീക്ഷവും ഉറപ്പാക്കേണ്ടത് അനിവാര്യമാണ്. കാലാകാലങ്ങളായി ഇടതു വിദ്യാര്ത്ഥി സംഘടനകളുടെ സമ്മര്ദങ്ങള്ക്ക് മുന്നില് ഭരണകൂടം മൃദുസമീപനം സ്വീകരിക്കുന്നുവെന്ന വിമര്ശനം ശക്തമാണ്. അദ്ധ്യാപകരെയും വിദ്യാഭ്യാസ സ്ഥാപനങ്ങളുടെ ഭരണാധികാരികളെയും ആക്രമിക്കുന്ന പ്രവണതകള്ക്കെതിരെ ശക്തമായ നിയമനടപടി സ്വീകരിക്കാത്തത് ഇത്തരം പ്രവണതകള്ക്ക് പ്രോത്സാഹനമാകുകകയാണ്. ഡോ. സിസാ തോമസിനെതിരെയുണ്ടായ ആക്രമണവുമായി ബന്ധപ്പെട്ട സംഭവങ്ങളില് പ്രതികളോട് സ്വീകരിച്ച സമീപനവും ഇതിന് ഉദാഹരണമായി ചൂണ്ടിക്കാണിക്കപ്പെടുന്നു. അദ്ധ്യാപകരുടെയും വൈസ് ചാന്സലര്മാരുടെയും സുരക്ഷ ഉറപ്പാക്കുകയും വിദ്യാഭ്യാസ സ്ഥാപനങ്ങളില് നിയമവാഴ്ചയും അക്കാദമിക അന്തരീക്ഷവും പുനഃസ്ഥാപിക്കുകയും ചെയ്യേണ്ടത് സര്ക്കാരിന്റെ ഉത്തരവാദിത്വമാണ്.
രാഷ്ട്രീയ താത്പര്യങ്ങള്ക്കുവേണ്ടി കേരളത്തിന്റെ ഉന്നത വിദ്യാഭ്യാസ മേഖലയെ തകര്ക്കാനുള്ള ഏത് നീക്കത്തെയും അക്കാദമിക സമൂഹം ശക്തമായി പ്രതിരോധിക്കും. സര്വകലാശാലകളുടെ സ്വാതന്ത്ര്യവും അധ്യാപകരുടെയും വിദ്യാര്ത്ഥികളുടെയും അവകാശങ്ങളും സംരക്ഷിക്കുന്നതിനായി ജനാധിപത്യപരമായ പോരാട്ടം ശക്തമാക്കുമെന്നും എബിആര്എസ്എം കെ.ടി.യു ഭാരവാഹികള് അറിയിച്ചു.
