മണ്ണാര്ക്കാട്: കാഞ്ഞിരപ്പുഴ അണക്കെട്ടിന്റെ റിസര്വോയറില് വെള്ളത്തിലൂടെ ജീപ്പില് സാഹസിക യാത്ര നടത്തിയ സംഭവത്തില് മണ്ണാര്ക്കാട് പോലീസ് അഞ്ചു പേരെ അറസ്റ്റ് ചെയ്തു.
വാഹനവും കസ്റ്റഡിയിലെടുത്തു. ജലസേചന വകുപ്പധികൃതരുടെ പരാതിയിയെ തുടര്ന്നാണ് കാഞ്ഞിരപ്പുഴ സ്വദേശികളായ അനസ് (26), മിഥുന് കൃഷ്ണ (26), നിഖില് (26), മുഹമ്മദ് ജംഷാദ് (26), വി.എന്.പ്രവീണ് (26) എന്നിവരെ അറസ്റ്റ് ചെയ്തത്.
പൊതുജനങ്ങള്ക്ക് പ്രവേശനമില്ലാത്ത സുരക്ഷിത മേഖലയായ ഡാം റിസര്വോയറില് അനുവാദമില്ലാതെ വാഹനവുമായി അതിക്രമിച്ചു കയറി ജീവന് അപകടം വരുന്ന വിധത്തില് വാഹനം ഓടിക്കുകയും വാഹനത്തിലെ പെട്രോളും ഓയിലും കലര്ന്ന് റിസര്വോയറിലെ കുടിവെള്ളം മലിനപ്പെടുകയും ചെയ്തതിനെ തുടര്ന്നാണ് കേസെടുത്തത്. അഭ്യാസപ്രകടനത്തിനുപയോഗിച്ച ജീപ്പ് ഇരുമ്പകച്ചോല ഭാഗത്തു നിന്നാണ് കസ്റ്റഡിയിലെടുത്തത്.
കേസില് അന്വേഷണം നടക്കുകയാണെന്നും പോലീസ് പറഞ്ഞു.
