ന്യൂദല്ഹി: റോഡപകടങ്ങളില് നടപടി സ്വീകരിക്കുന്നതിലെ കാലതാമസം ഒഴിവാക്കാന് മാര്ഗനിര്ദേശങ്ങള് കര്ക്കശമാക്കി നാഷണല് ഹൈവേ അതോറിറ്റി ഓഫ് ഇന്ത്യ. 10 കിലോമീറ്റര് ചുറ്റളവിലാണ് അപകടം നടന്നതെങ്കില്, ദേശീയപാതകളില് വിന്യസിച്ചിരിക്കുന്ന ആംബുലന്സുകള് ഇനി 10 മിനിറ്റിനുള്ളില് സ്ഥലത്ത് എത്തണം. അറിയിപ്പ് ഒരു മിനിറ്റിനുള്ളില് സ്വീകരിക്കണം, ആംബുലന്സ് രണ്ട് മിനിറ്റിനുള്ളില് നീങ്ങിത്തുടങ്ങണം, അറിയിപ്പ് ലഭിച്ച് ഒരു മണിക്കൂറിനുള്ളില് അപകടത്തില്പ്പെട്ടയാള് അടുത്തുള്ള ആശുപത്രിയില് എത്തിയിരിക്കണം.
സമയപരിധി പാലിക്കാത്ത ഓരോ സംഭവത്തിനും 10,000 രൂപ വരെയും പ്രതികരിക്കാന് ഒരു മിനിറ്റില് കൂടുതല് വൈകിയാല് ഓരോ അധിക മിനിറ്റിനും 5,000 രൂപയും പിഴ ഈടാക്കും.
സുപ്രീം കോടതി റോഡ് സുരക്ഷാ സമിതിയും സിഎജിയും നടത്തിയ പെര്ഫോമന്സ് ഓഡിറ്റില് റോഡപകടങ്ങളില് നടപടി സ്വീകരിക്കുന്നതിലെ കാലതാമസം ചൂണ്ടിക്കാണിച്ചതിനെ തുടര്ന്നാണ് നാഷണല് ഹൈവേ അതോറിറ്റി നിയന്ത്രണങ്ങള് കര്ശനമാക്കിയത്.
