തിരുവനന്തപുരം: കൊലക്കേസിൽ ജീവപര്യന്തം ശിക്ഷിക്കപ്പെട്ട് പൂജപ്പുര സെൻട്രൽ ജയിലിൽക്കഴിയുന്ന പ്രതിക്ക് ഒരു മാസത്തോളമായി ആയുർവേദ കോളേജിൽ കർക്കടക സുഖചികിത്സ. ജയിൽ അധികൃതരുടെ ഒത്താശയോടെയാണ് ഇത്. പോത്തൻകോട് റെജി കൊലക്കേസിൽ ജീവപര്യന്തം ശിക്ഷിക്കപ്പെട്ട പ്രതിക്ക് കാലിനു നീരെന്ന നിസ്സാര കാരണം പറഞ്ഞാണ് ആയുർവേദ കോളേജിലേക്കു മാറ്റിയത്. ജയിലിലെ ആയുർവേവേദ ആശുപത്രിയിൽ ജോലിചെയ്തുവരുകയാണ് പ്രതി.
ചികിത്സ വേണ്ട ധാരാളം രോഗികൾ ജയിലിലുണ്ടെങ്കിലും അവർക്ക് ലഭിക്കാത്ത പരിഗണനയാണ് ഇയാൾക്ക് ലഭിച്ചത്.2010-ൽ ഓണാഘോഷ പരിപാടിയുമായി ബന്ധപ്പെട്ട തർക്കത്തിലാണ് പോത്തൻകോട് ചേങ്കോട്ടുകോണത്തുവെച്ച് റെജി കൊലചെയ്യപ്പെട്ടത്. ബോംബെറിഞ്ഞുവീഴ്‌ത്തിയശേഷം അക്രമിസംഘം റെജിയെ വെട്ടിക്കൊല്ലുകയായിരുന്നു. പത്ത് പ്രതികളുള്ള ഈ കേസിലെ പ്രധാന പ്രതിയാണ് സുഖചികിത്സയിൽ കഴിയുന്നത്.
പൂജപ്പുര സെൻട്രൽ ജയിലിലെ ഹോമിയോ ഡിസ്പെൻസറിയിൽ തടവുകാരിൽനിന്ന് മൊബൈൽഫോൺ പിടിച്ചെടുത്തിരുന്നു. ഇതേ പ്രതി ഉൾപ്പെട്ട സംഘമാണ് ഈ സംഭവത്തിൽ പിടിയിലായത്. വൻ സുരക്ഷാവീഴ്ചയും വിവാദവും സൃഷ്ടിച്ച ഈ സംഭവത്തിൽ തുടരന്വേഷണം അട്ടിമറിക്കപ്പെട്ടിരുന്നു, ഇതേ കേസിലെ പ്രതിയാണ് ഇയാൾ.
