ന്യൂദൽഹി: പാർലമെന്റിന്റെ ഇരു സഭകളിലും കാലത്ത് 11 മണി മുതൽ നടപടികൾ തുടങ്ങിയെങ്കിലും ലോക്സഭയിൽ പ്രതിപക്ഷം ബഹളം ഉണ്ടാക്കുന്നത് തുടർന്നു. നടപടികളിലേക്ക് കടക്കാൻ ആകാഞ്ഞതിനെ തുടർന്ന് രണ്ടുമണിവരെ നിർത്തി. രാജ്യസഭയിൽ അദ്ധ്യക്ഷൻ സി.പി. രാധാകൃഷ്ണൻ നേരേ കാര്യപരിപാടികളിലേക്ക് നടന്നു.
എന്നാൽ ലോക്സഭയിൽ പ്രതിപക്ഷം സ്പീക്കർ ഓം പ്രകാശ് ബിർലയുടെ ആവർത്തിച്ചുള്ള ആവശ്യങ്ങളോട് പ്രതിപക്ഷം സഹകരിച്ചില്ല. തുടർന്നാണ് രണ്ടുമണിവരെ സഭ നിർത്തിവെച്ചത്.
സഭ സമ്മേളിച്ചപ്പോൾത്തന്നെ സ്പീക്കർ കാര്യങ്ങൾ വിശദീകരിച്ചു. ഇന്ന് അന്താരാഷ്ട്ര യുവദിനംകൂടിയാണ്. നമുക്ക് യുവജനതയുടെ പലപല വിഷയങ്ങൾ ചർച്ച ചെയ്യാനുണ്ട്, സഭാ സമ്മേളനം അവസാനിക്കാനിരിക്കെ നിയമ നിർമ്മാണം നടക്കാനുണ്ട്, ആഭ്യന്തരമന്ത്രി സംസാരിക്കാൻ തയാറായി ഉണ്ട്. കാര്യപരിപാടികൾ ലിസ്റ്റ് ചെയ്തിട്ടുണ്ട്. അതിനാൽ ചോദ്യോത്തരവേള കഴിഞ്ഞ് മറ്റു കാര്യപരിപാടികളിലേക്ക് കടക്കാം എന്ന് അഭ്യർത്ഥിച്ചെങ്കിലും പ്രതിപക്ഷം സഹകരിച്ചില്ല. തുടർന്ന് സഭാ സമ്മേളനം ഉച്ചയ്ക്ക് രണ്ടുവരെ നിർത്തിവെക്കുന്നതായി അറിയിക്കുകയായിരുന്നു.
ബഹളം മൂലം രാജ്യസഭയും പിന്നീട് പിരിഞ്ഞു. രാജ്യസഭാധ്യക്ഷന്റെ ഔദ്യോഗിക പ്രസ്താവന തടസപ്പെടുത്തിയായിരുന്നു പ്രതിപക്ഷ പ്രതിഷേധങ്ങൾ.
