തിരുവനന്തപുരം: ഔദ്യോഗിക ചടങ്ങുകളില് ദേശീയഗാനത്തിന് പുറമെ ദേശീയ ഗീതമായ ‘വന്ദേമാതരം’ അതിന്റെ പൂര്ണരൂപത്തില് നിര്ബന്ധമായും ആലപിക്കണമെന്ന കേന്ദ്ര നിയമ ഭേദഗതി പ്രായോഗികമല്ലെന്ന് കോണ്ഗ്രസ് എം.പി ശശി തരൂര്. ചടങ്ങുകളുടെ തുടക്കത്തിലും അവസാനവും വന്ദേമാതരം പൂര്ണമായി പാടണമെന്ന വ്യവസ്ഥ പ്രായോഗികമല്ല. ദേശീയഗാനം പാടാന് 52 സെക്കന്ഡും വന്ദേമാതരത്തിന് 3 മിനിറ്റ് 10 സെക്കന്ഡും സമയമെടുക്കും.
സംസ്ഥാന ഗാനങ്ങള് കൂടിയാകുമ്പോള് ജനങ്ങള് 6 മിനിറ്റോളം എഴുന്നേറ്റ് നില്ക്കണം.തമിഴ്നാട് പോലുള്ള സംസ്ഥാനങ്ങളില് ആദ്യം രണ്ട് മിനിറ്റ് നീളുന്ന തമിഴ് സംസ്ഥാന ഗീതവും ആലപിക്കുന്നുണ്ടെന്ന് തരൂര് ഓര്മ്മിപ്പിക്കുന്നു.ഒരു ചടങ്ങില് ആകെ 12 മിനിറ്റോളം എഴുന്നേറ്റ് നില്ക്കണമെന്ന് പറയുന്നത് പ്രായോഗികമല്ല.ബഹുമാനവും ക്ഷമയും നിയമം വഴി അടിച്ചേല്പ്പിക്കാനാകുമോ എന്നാണ് ശശി തരൂര് ചോദിക്കുന്നത്.ദേശീയഗീതത്തോടുള്ള ബഹുമാനം വര്ദ്ധിപ്പിക്കാനെന്ന പേരിലുള്ള നിയമം വിപരീതഫലമാകും ഉണ്ടാക്കുകയെന്ന് അദ്ദേഹം പറഞ്ഞു.
പാര്ലമെന്റില് ചര്ച്ച കൂടാതെയാണ് ഈ ഭേദഗതി പാസാക്കിയതെന്ന് ശശി തരൂര് എക്സില് കുറിച്ചു. വന്ദേമാതരത്തെയും ജനഗണമനയെയും താന് പൂര്ണമായി ബഹുമാനിക്കുന്നുണ്ട്. വന്ദേമാതരത്തിന്റെ ആദ്യ രണ്ട് വരികള് പാടാന് തനിക്കറിയാമെന്നും തരൂര് പറഞ്ഞു.
ഔദ്യോഗിക ചടങ്ങുകള്ക്ക് മുമ്പ് വന്ദേമാതരം പാടണമെന്ന് കേന്ദ്ര സര്ക്കാര് നേരത്തേ ഉത്തരവിറക്കിയിട്ടുണ്ട്.അതേസമയം, വന്ദേമാതരം പൂര്ണമായി പാടില്ലെന്നാണ് കോണ്ഗ്രസ്, മുസ്ലീം ലീഗ് പാര്ട്ടികളുടെ നിലപാട്.ഹൈന്ദവദേവകതളെ സ്തുതിക്കുന്ന വരികള് ഉളളതാണ് ഇക്കൂട്ടരുടെ ഈ നിലപാടിന് പിന്നില്.
