ലണ്ടണ്: ക്രിക്കറ്റിലെ എക്കാലത്തെയും മികച്ച ബാറ്റ്സ്മാന് ഭാരതത്തിന്റെ സച്ചിന് ടെന്ഡുല്ക്കറാണെങ്കിലും, ഏറ്റവും മികച്ച ക്രിക്കറ്റര് ദക്ഷിണാഫ്രിക്കന് ഇതിഹാസ ഓള്റൗണ്ടര് ജാക്വിസ് കാലിസാണെന്ന് മുന് ഓസ്ട്രേലിയന് ഫാസ്റ്റ് ബൗളര് ബ്രെറ്റ് ലീ. റണ്വീര് അല്ലാബാദിയയുടെ’ബിയര് ബൈസെപ്സ്’ പോഡ്കാസ്റ്റില് സംസാരിക്കുമ്പോഴാണ് ബ്രെറ്റ് ലീ തന്റെ അഭിപ്രായം വ്യക്തമാക്കിയത്.
‘ക്രിക്കറ്റ് ചരിത്രത്തിലെ ഏറ്റവും മികച്ച ബാറ്റ്സ്മാന് സച്ചിന് ടെന്ഡുല്ക്കറാണെന്ന് ഞാന് എപ്പോഴും പറയാറുണ്ട്. എന്നാല് ഏറ്റവും മികച്ച ക്രിക്കറ്റര് ജാക്വിസ് കാലിസാണ്. കായികരംഗത്തെ അദ്ദേഹത്തിന്റെ കണക്കുകള് അതിശയിപ്പിക്കുന്നതാണ്. ബാറ്റിംഗിലും ബൗളിംഗിലും ഒരുപോലെ തിളങ്ങിയ അദ്ദേഹത്തിന്റെ റെക്കോര്ഡുകള് കള്ളം പറയില്ല, ബ്രെറ്റ്ലി പറഞ്ഞു. അന്താരാഷ്ട്ര തലത്തില് എതിരാളികളായിരുന്നെങ്കിലും ഐപിഎല്ലില് കൊല്ക്കത്ത നൈറ്റ് റൈഡേഴ്സില് ഒന്നിച്ച് കളിച്ച അനുഭവം ലീ പങ്കുവെച്ചു.
മത്സരങ്ങള്ക്ക് തൊട്ടുമുമ്പ് പോലും കാലിസിന് ഒരു സമ്മര്ദ്ദവുമില്ലായിരുന്നുവെന്നും, ബാറ്റിംഗിനിറങ്ങുന്നതിന് തൊട്ടുമുമ്പ് വരെ വളരെ ശാന്തനായി കാണപ്പെട്ടിരുന്ന പ്രകൃതമായിരുന്നു അദ്ദേഹത്തിന്റേതെന്നും ബ്രെറ്റ് ലീ കൂട്ടിച്ചേര്ത്തു. അതേസമയം, പുള് ഷോട്ടുകള് മികച്ച രീതിയില് കളിക്കുന്ന താരങ്ങളായി രോഹിത് ശര്മ്മയെയും ഓസ്ട്രേലിയന് മുന് ക്യാപ്റ്റന് റിക്കി പോണ്ടിംഗിനെയും ബ്രെറ്റ് ലീ പ്രശംസിച്ചു.
