കൊച്ചി: പിറവം പിറമാടം സെന്റ് ജോര്‍ജ് ബത്ലഹേം പള്ളിയില്‍ ഓര്‍ത്തഡോക്‌സ്-യാക്കോബായ വിഭാഗങ്ങളിലെ വൈദികര്‍ ഏറ്റുമുട്ടി.പിന്നാലെ പൊലീസ് പള്ളിയുടെ നിയന്ത്രണം ഏറ്റെടുത്തു.
അടുത്ത ദിവസം കളക്ടറുമായുളള ചര്‍ച്ചയ്‌ക്ക് ശേഷമാകും ഇനി ആരാധന നടക്കുക.പള്ളിതര്‍ക്കത്തില്‍ കോടതിയില്‍ നിന്ന് ലഭിച്ച അനുകൂല ഉത്തരവുമായാണ് ഓര്‍ത്തഡോക്‌സ് വിഭാഗത്തിലെ രണ്ടുവൈദികര്‍ പള്ളിയിലെത്തിയത്.
യാക്കോബായ വിശ്വാസികളുടെ കുര്‍ബാന നടക്കുന്നതിനിടെ വൈദികര്‍ പള്ളിക്കകത്ത് കയറി അവര്‍ക്ക് പ്രാര്‍ത്ഥനാ സൗകര്യമൊരുക്കണമെന്ന് ആവശ്യപ്പെട്ടു.ഇതോടെ ഇരുവിഭാഗങ്ങളും തമ്മില്‍ തര്‍ക്കമായി.പിന്നാലെ ഇരുവിഭാഗങ്ങളിലെയും വൈദികര്‍ തമ്മില്‍ ഏറ്റുമുട്ടുകയായിരുന്നു.
പള്ളിയില്‍ തങ്ങള്‍ക്കും പ്രാര്‍ത്ഥനയ്‌ക്ക് സൗകര്യമൊരുക്കുന്നത് വരെ പിന്മാറില്ലെന്ന് ശഠിച്ച ഓര്‍ത്തഡോക്‌സ് വിഭാഗം വൈദികര്‍ പള്ളിയുടെ പുറത്ത് പ്രതിഷേധിച്ചു. വിവരമറിഞ്ഞ് സ്ഥലത്തെത്തിയ പിറവം പൊലീസ് വൈദികരുമായി സംസാരിച്ചപ്പോള്‍ കോടതി ഉത്തരവ് പ്രകാരമാണ് പള്ളിയിലെത്തിയതെന്നും പ്രാര്‍ത്ഥന നടത്താന്‍ അനുവദിക്കണമെന്നും വൈദികര്‍ ആവശ്യപ്പെട്ടു. ഇതോടെയാണ് പള്ളിയുടെ നിയന്ത്രണം പൊലീസ് താല്‍ക്കാലികമായി ഏറ്റെടുത്തത്.
