കൊല്‍ക്കത്ത: ഹോട്ടല്‍ മുറികളില്‍ കേബിള്‍ ടിവി വഴി പാട്ട് അടക്കമുള്ളവ കേള്‍പ്പിക്കുന്നതിന് പ്രത്യേകം റോയല്‍റ്റി നല്‍കണമെന്ന് കല്‍ക്കട്ട ഹൈക്കോടതി വിധിച്ചു. ലൈസന്‍സ് എടുക്കാതെയും റോയല്‍റ്റി നല്‍കാതെയും ഹോട്ടല്‍ മുറികളില്‍ സ്ഥാപിച്ചിരിക്കുന്ന ടെലിവിഷന്‍ സെറ്റുകളിലൂടെ തങ്ങളുടെ അംഗങ്ങളുടെ പകര്‍പ്പവകാശമുള്ള കലാ സാഹിത്യ സംഗീത സൃഷ്ടികള്‍ താമസക്കാര്‍ക്ക് നല്‍കുന്നുവെന്ന് ആരോപിച്ച് ഹോട്ടല്‍ അപ്പോളോ & ടൂര്‍സ് പ്രൈവറ്റ് ലിമിറ്റഡിനെതിരെ ഇന്ത്യന്‍ പെര്‍ഫോമിംഗ് റൈറ്റ് സൊസൈറ്റി ലിമിറ്റഡ് സമര്‍പ്പിച്ച ഹര്‍ജിയിലാണ് കോടതി ഉത്തരവ്.
സംപ്രേക്ഷണ അവകാശങ്ങള്‍ ഉള്ള കേബിള്‍ ഓപ്പറേറ്റര്‍ക്ക് വരിസംഖ്യ നല്‍കുന്നുണ്ടെന്നും അതിനാല്‍ പ്രത്യേകം റോയല്‍റ്റി നല്‍കേണ്ടതില്ലെന്നും ഹോട്ടല്‍ വാദിച്ചെങ്കിലും കോടതി അംഗീകരിച്ചില്ല. കേബിള്‍ ടിവി ഓപ്പറേറ്റര്‍മാര്‍ എടുക്കുന്ന ലൈസന്‍സ് അവരുടെ വരിക്കാര്‍ക്ക് മാത്രമുള്ളതാണ്. ഹോട്ടലിലെ താമസക്കാരെ വരിക്കാരായി അംഗീകരിക്കാന്‍ കഴിയില്ലെന്നും ഹോട്ടല്‍ മുറികളിലെ കേബിള്‍ ടിവി കണ്്ഷന്‍ വാണിജ്യപരമായ സൗകര്യമാണെന്നും കോടതി ചൂണ്ടിക്കാട്ടി.
