ഇസ്താംബുള് വിമാനത്താവളത്തിലെത്തിയ മുഹമ്മദ് സലാ ആരാധകരുടെ സ്വീകരണം ഏറ്റുവാങ്ങിയപ്പോള്
ഇസ്താംബുള്: ഈജിപ്ഷ്യന് ഫുട്ബോള് സൂപ്പര് താരം മൊഹമ്മദ് സലാ തുര്ക്കിഷ് സൂപ്പര് ലീഗ് ക്ലബ്ബായ ട്രാബ്സണ്സ്പോറുമായി കരാറിലെത്തി.
ലിവര്പൂളുമായുള്ള കരാര് അവസാനിപ്പിച്ച് ഫ്രീ ഏജന്റായി മാറിയ 34കാരനായ സലാ രണ്ടു വര്ഷത്തെ കരാറിലാണ് ക്ലബ്ബില് ചേരുന്നത്. റിപ്പോര്ട്ടുകള് പ്രകാരം പ്രതിവര്ഷം 17 ദശലക്ഷം യൂറോയോളമാണ് ട്രാബ്സണ്സ്പോര് സലാക്ക് വാഗ്ദാനം ചെയ്തിരിക്കുന്നത്. ഇതോടെ തുര്ക്കിഷ് ലീഗിലെ ഏറ്റവും ഉയര്ന്ന പ്രതിഫലം വാങ്ങുന്ന താരമായി സലാ മാറും. ബെസിക്താസ് സൗദി പ്രോ ലീഗ് ക്ലബ്ബുകള്, അമേരിക്കന് എം.എല്.എസ് ക്ലബ്ബുകള് എന്നിവരും താരത്തിനായി ശ്രമിച്ചിരുന്നെങ്കിലും ട്രാബ്സണ്സ്പോര് കരാര് സ്വന്തമാക്കുകയായിരുന്നു.
ആന്ഫീല്ഡില് ചിലവഴിച്ച 9 വര്ഷത്തിനിടെ 442 മത്സരങ്ങളില് നിന്ന് 257 ഗോളുകള് സലാ നേടിയിട്ടുണ്ട്. ലിവര്പൂളിന്റെ സര്വ്വകാല ഗോള് വേട്ടക്കാരില് മൂന്നാം സ്ഥാനത്തുള്ള താരം ചാമ്പ്യന്സ് ലീഗ്, പ്രീമിയര് ലീഗ് ഉള്പ്പെടെ ഏഴ് പ്രധാന കിരീട നേട്ടങ്ങളില് ലിവറിനൊപ്പമുണ്ടായിരുന്നു. കഴിഞ്ഞ സീസണ് തുര്ക്കിഷ് സൂപ്പര് ലീഗില് മൂന്നാം സ്ഥാനത്ത് ഫിനിഷ് ചെയ്ത ട്രാബ്സണ്സ്പോര് വരും സീസണിലെ യൂറോപ്പ ലീഗ് പ്ലേഓഫില് മത്സരിക്കുന്നുണ്ട്.
