വാന്കൂവര്: സൂപ്പര് താരം മുഹമ്മദ് സലായുടെ മിന്നും പ്രകടനത്തിന്റെ മികവില് ലോകകപ്പ് ഫുട്ബോള് 2026ല് ഈജിപ്തിന് ആദ്യ വിജയം. ഇന്നലെ വെളുപ്പിന് നടന്ന മത്സരത്തില് ന്യൂസിലന്ഡിനെ 3-1ന് തോല്പ്പിച്ച് ഗ്രൂപ്പ് ജിയില് നാല് പോയിന്റോടെ ഒന്നാം സ്ഥാനക്കാരായി. ആദ്യ പകുതിയില് ഒരു ഗോള് പിന്നില് നിന്ന ശേഷമാണ് ഈജിപ്ത് മൂന്ന് ഗോളുകള് തിരിച്ചടിച്ച് ഗംഭീര വിജയം കൈവരിച്ചത്. ലോകകപ്പ് ചരിത്രത്തില് ഈജിപ്ത്തിന്റെ ആദ്യജയമാണിത്.
15-ാം മിനിറ്റില് പ്രതിരോധ താരം ഫിന് സര്മാന് നേടിയ ഗോളില് ന്യൂസിലന്ഡ് മുന്നിലെത്തി. ഇതിനെതിരെ 58-ാം മിനിറ്റില് ഈജിപ്തിനായി മൊസ്തഫ സികോ സമനില ഗോള് നേടി. ഒമ്പത് മിനിറ്റുകള്ക്ക് ശേഷം ക്ലബ് ഫുട്ബോളില് ഇന്ദ്രജാലം തീര്ത്ത സൂപ്പര് സലാ ലോകകപ്പിലെ ഗോള് നേട്ടം സ്വന്തമാക്കി ഈജിപ്തിന് ലീഡ് സമ്മാനിച്ചു. 82-ാം മിനിറ്റില് ഈജിപ്ത് വിജയം ഉറപ്പിച്ച ഗോള് മൂന്നാം ഗോള് നേടുന്നതിന് വഴിയൊരുക്കിയതും സലാ ആയിരുന്നു. പകരക്കാരനായിറങ്ങിയ ട്രെസെഗെ ആണ് ഗോള് നേടിയത്.
മുഹമ്മദ് സലാ റിക്കാര്ഡ് പുസ്തകങ്ങള് തിരുത്തിയെഴുതിയിട്ടുണ്ട്. കരിയറിലെ അവസാന ലോകകകപ്പിനിറങ്ങിയിരിക്കുന്ന ഈ താരം ഇതുവരെ ഒരു ഗോളും രണ്ട് അസിസ്റ്റുകളുമായി കളം നിറയുകയാണ്. സലായ്ക്ക് പൊരുത്തപ്പെടാന് പ്രയാസമുള്ള 4-2-3-1 ഫോര്മേഷനിലാണ് കോച്ച് ഹൊസ്സാം ഹസ്സന് ടീമിനെ വിന്യസിച്ചത്. മത്സരത്തിന് മുമ്പ് സൂപ്പര് താരം ഇതിന് പച്ചക്കൊടി കാട്ടിയത് ആത്മവിശ്വാസം പകര്ന്നെന്നും കോച്ച് മത്സരശേഷം പറഞ്ഞു. ആദ്യ പകുതിയില് മത്സരഫലം സൂചിപ്പിക്കുന്നപോലെയായിരുന്നു സലയും ഈജിപ്തും കളിച്ചുകൊണ്ടിരുന്നത്. രണ്ടാം പകുതിയിലേക്ക് കളിയെത്തുമ്പോള് സലാ നിയന്ത്രണം ഏറ്റെടുത്തു. പിന്നെ കണ്ടത് തകര്പ്പന് ജയം. ‘നമുക്ക് ചരിത്രം സൃഷ്ടിക്കാനും ഗ്രൂപ്പില് ഒന്നാമതെത്താനും കഴിയും, വരും വര്ഷങ്ങളില് ഇത് ഞങ്ങളുടെ ഏറ്റവും മികച്ച നേട്ടങ്ങളിലൊന്നായി നിങ്ങള് ഓര്ക്കും,’ -സലാ പറഞ്ഞു.
