മിസൂറി: സെന്‍റ് ലൂയിസ് റാപ്പിഡ് ആന്‍റ് ബ്ലിറ്റ്സ് ചെസ്സ് ടൂര്‍ണ്ണമെന്‍റിലെ റാപ്പിഡ് വിഭാഗത്തില്‍ ചാമ്പ്യനായി പ്രജ്ഞാനന്ദ. ഇനി ബ്ലിറ്റ്സ് മത്സം കൂടി ബാക്കിയുണ്ട്. റാപ്പിഡ് വിഭാഗത്തില്‍ ആകെയുള്ള ഒമ്പത് റൗണ്ടില്‍ നിന്നും 12 പോയിന്‍റുകളോടെയാണ് പ്രജ്ഞാനന്ദ ചാമ്പ്യനായത്. ഈ പോയിന്‍റുകളുടെ അടിസ്ഥാനത്തില്‍ ലോകപ്രശസ്ത ഗ്രാന്‍റ് ടൂര്‍ ചെസ്സിന്റെ ഫൈനലിലേക്ക് തെരഞ്ഞെടുക്കപ്പെട്ടു.
അവസാന റൗണ്ടില്‍ ഡച്ച് ഗ്രാന്‍റ് മാസ്റ്റര്‍ ജോര്‍ദന്‍ വാന്‍ ഫോറീസ്റ്റിനോട് തോല്‍വി ഏറ്റുവാങ്ങിയെങ്കിലും ബാക്കി എട്ട് റൗണ്ടുകളില്‍ നാല് വിജയവും നാല് സമനിലയും പ്രജ്ഞാനന്ദ നേടി. 11 പോയിന്‍റോടെ ഉസ്ബെക് താരം ജോവോഖിര്‍ സിന്‍ഡൊറോവാണ് രണ്ടാം സ്ഥാനത്ത്. പത്ത് പോയിന്‍റ് നേടിയ അമേരിക്കന്‍ ഗ്രാന്‍റ് മാസ്റ്റര്‍ വെസ്ലി സോ മൂന്നാം സ്ഥാനം നേടി. ലോക രണ്ടാം നമ്പര്‍ താരമായ അമേരിക്കയുടെ ഫാബിയാനോ കരുവാന പിന്നിലേക്ക് തള്ളപ്പെട്ടു.
പക്ഷെ ബ്ലിറ്റ്സ് മത്സരത്തിലെ പോയിന്‍റ് കൂടി കണക്കാക്കിയാണ് സെന്‍റ് ലൂയിസ് റാപ്പിഡ് ആന്‍റ് ബ്ലിറ്റസിന്റെ ചാമ്പ്യനെ തെരഞ്ഞെടുക്കുക. തൊട്ടു പിറകില്‍നില്‍ക്കുന്ന ജോവോഖിര്‍ സിന്‍ഡൊറോവും വെസ്ലിസോയും പ്രജ്ഞാനന്ദയ്‌ക്ക് വെല്ലുവിളിയാണ്. ഒമ്പത് പോയിന്‍റോടെ നില്‍ക്കുന്ന ജര്‍മ്മനിയുടെ വിന്‍സെന്‍റ് കെയ്‌മറും ബ്ലിറ്റ്സില്‍ മിടുക്കനാണെന്നതും വെല്ലുവിളി തന്നെ.
