രാജ്യത്തെ ഊര്ജ്ജ മേഖലയില് വിപ്ലവകരമായ മാറ്റങ്ങള് സൃഷ്ടിച്ചുകൊണ്ട് കേന്ദ്ര സര്ക്കാരിന്റെ ‘പി.എം സൂര്യ ഘര്: മുഫ്ത് ബിജ്ലി യോജന’ (സൗജന്യ വൈദ്യുത പദ്ധതി) 50.06 ലക്ഷത്തിലധികം കുടുംബങ്ങളില് പുരപ്പുറ സൗര പാനലുകള് സ്ഥാപിച്ച് ചരിത്രപരമായ നാഴികക്കല്ല് പിന്നിട്ടു. കേന്ദ്ര നവ, പുനരുപയോഗ ഊര്ജ്ജ മന്ത്രാലയത്തിന് കീഴില് 75,021 കോടി രൂപ പദ്ധതി വിഹിതത്തോടെ നടപ്പിലാക്കുന്ന ഈ സംരംഭം, ലോകത്തിലെ തന്നെ ഏറ്റവും വലിയ പുരപ്പുറ സൗര പദ്ധതികളില് ഒന്നാണ്.
കഴിഞ്ഞ ഒരു ദശാബ്ദത്തിനിടെ രാജ്യത്ത് ആകെ 7.94 ലക്ഷം പുരപ്പുറ സൗര പാനലുകള് മാത്രമാണ് സ്ഥാപിച്ചിരുന്നത്. എന്നാല്, പദ്ധതി ആരംഭിച്ച് വെറും രണ്ട് വര്ഷത്തിനുള്ളില് 50 ലക്ഷത്തിലധികം പാനലുകള് സ്ഥാപിക്കാന് സാധിച്ചത് അഭൂതപൂര്വ്വമായ കുതിപ്പ് വ്യക്തമാക്കുന്നു.
അതിവേഗ വളര്ച്ചയും പ്രതിമാസ കുതിപ്പും
പ്രധാനമന്ത്രി നരേന്ദ്ര മോദിയുടെ നേതൃത്വത്തില്, ലോകത്തില് തന്നെ ഏറ്റവും വേഗത്തില് വളരുന്ന ശുദ്ധ ഊര്ജ്ജ പദ്ധതിയായി ഇത് മാറി. നിലവില് പ്രതിവാരം ഒരു ലക്ഷം കുടുംബങ്ങള്ക്ക് ഇതിന്റെ പ്രയോജനം ലഭിക്കുന്നു.
കഴിഞ്ഞ ഒമ്പത് മാസത്തിനിടെ പാനലുകള് സ്ഥാപിക്കുന്നതിന്റെ വേഗത 3.2 മടങ്ങ് വര്ദ്ധിച്ചു. 2025 ഒക്ടോബറില് പ്രതിദിനം 5,038 ആയിരുന്ന പാനല് സ്ഥാപനം 2026 ജൂലൈയില് പ്രതിദിനം 16,328 ആയി ഉയര്ന്നു. 2026 ജൂലൈ മാസത്തില് മാത്രം 5.06 ലക്ഷം കുടുംബങ്ങള്ക്ക് പദ്ധതിയുടെ പ്രയോജനം ലഭിച്ചു. പദ്ധതിയുടെ ചരിത്രത്തിലെ ഏറ്റവും ഉയര്ന്ന പ്രതിമാസ നിരക്കാണിത്.
സാമ്പത്തിക ആനുകൂല്യങ്ങളും തുകരഹിത ബില്ലുകളും
ഗുണഭോക്താക്കള്ക്ക് വലിയ സാമ്പത്തിക ആശ്വാസമാണ് പദ്ധതി നല്കുന്നത്:
നേരിട്ടുള്ള സബ്സിഡി: നേരിട്ടുള്ള ആനുകൂല്യ കൈമാറ്റം വഴി 28,024 കോടി രൂപ സബ്സിഡിയായി ഗുണഭോക്താക്കളുടെ അക്കൗണ്ടുകളിലേക്ക് നേരിട്ടെത്തിച്ചു. ഇതിന്റെ ഫലമായി 19 ലക്ഷത്തോളം കുടുംബങ്ങള്ക്ക് ഇപ്പോള് തുകരഹിത വൈദ്യുതി ബില്ലുകളാണ് ലഭിക്കുന്നത്.
മിച്ച വൈദ്യുതിയിലൂടെ വരുമാനം: 2024-25 സാമ്പത്തിക വര്ഷത്തില് 12 ലക്ഷത്തിലധികം കുടുംബങ്ങള് മിച്ച വൈദ്യുതി ഗ്രിഡിലേക്ക് നല്കിയതിലൂടെ ആകെ 421 കോടി രൂപ സമ്പാദിച്ചു. അതായത്, ഒരു കുടുംബത്തിന് പ്രതിവര്ഷം ശരാശരി 3,500 അധിക രൂപ വരുമാനം ലഭിക്കുന്നു.
ലളിതമായ വായ്പയും വികേന്ദ്രീകൃത മാതൃകയും
താഴ്ന്ന വരുമാനക്കാര്ക്കും പദ്ധതി പ്രാപ്യമാക്കാന് പ്രത്യേക നടപടികള് സ്വീകരിച്ചിട്ടുണ്ട്:
ആനുകൂല്യ വായ്പകള്: ജന് സമര്ത്ഥ് പോര്ട്ടല് വഴി 21.87 ലക്ഷം അപേക്ഷകര്ക്ക് ആര്.ബി.ഐയുടെ റിപ്പോ നിരക്കില് 50 ബേസിസ് പോയിന്റുകള് മാത്രം ചേര്ത്ത് 5.75% പലിശ നിരക്കില് കടലാസ് രഹിത വായ്പകള് ലഭ്യമാക്കി. ഇതില് 17.5 ലക്ഷം സ്ഥാപനങ്ങള് വായ്പാ ധനസഹായത്തോടെ പൂര്ത്തിയായി.
യൂട്ടിലിറ്റി ലെഡ് അഗ്രഗേഷന് മോഡല്: നാല് സംസ്ഥാനങ്ങളിലായി പിഎംഎവൈ, ബിപിഎല്, എസ്സി/ എസ്ടി കുടുംബങ്ങള്ക്കായി 1.6 ലക്ഷം സൗര പാനലുകള് സ്ഥാപിച്ചു. 12 സംസ്ഥാനങ്ങളില് കൂടി ഈ മാതൃക വ്യാപിപ്പിക്കാന് അനുമതി ലഭിച്ചിട്ടുണ്ട്. ഇത് സര്ക്കാരിന്റെ താരിഫ് സബ്സിഡി ബാധ്യത കുറയ്ക്കുന്നതിനൊപ്പം സാധാരണക്കാര്ക്ക് സോളാര് ഊര്ജ്ജം ഉറപ്പാക്കുന്നു.
സുതാര്യവും ഡിജിറ്റലുമായ പ്രക്രിയ
അപേക്ഷ സമര്പ്പിക്കല് മുതല് സബ്സിഡി വിതരണം വരെ പൂര്ണ്ണമായും 100% ഓണ്ലൈനിലാണ് നടക്കുന്നത്. അതിനാല് ഉപഭോക്താക്കള് ഓഫീസുകള് കയറിയിറങ്ങുകയോ കടലാസ് രേഖകള് നേരിട്ട് നല്കുകയോ വേണ്ടതില്ല.
സാങ്കേതിക സംയോജനം: 15 ദിവസത്തിനകം സബ്സിഡി നല്കുന്ന പിഎഫ്എംഎസ് സംയോജനം, 80-ലധികം ഡിസ്കോമുകളുമായുള്ള എപിഐ സംയോജനം, ഡിജിറ്റല് നെറ്റ് മീറ്ററിംഗ് കരാറുകള്, വിതരണക്കാരുടെ ഗുണനിലവാരം വ്യക്തമാക്കുന്ന സ്റ്റാര് റേറ്റിംഗ് സംവിധാനം എന്നിവ ഇതിനായി ഏര്പ്പെടുത്തി.
ആഭ്യന്തര ഉല്പ്പാദനം: ഡിസിആര് പോര്ട്ടല് വഴിയുള്ള സംയോജനം വഴി ഉപകരണങ്ങള് ആഭ്യന്തരമായി നിര്മിച്ചവയാണെന്ന് ഉറപ്പാക്കുന്നു.
നിയമ ലളിതവത്കരണം: 10 കിലോവാട്ട് വരെയുള്ള പാനലുകള്ക്ക് ഡീംഡ് അപ്രൂവല്, പ്രാവര്ത്തികതാ ഇളവ് എന്നിവ അനുവദിച്ചു. 32 സംസ്ഥാനങ്ങളും കേന്ദ്രഭരണ പ്രദേശങ്ങളും അപേക്ഷാ നിരക്കുകളും നെറ്റ് മീറ്ററിംഗ് നിരക്കുകളും പൂര്ണ്ണമായി ഒഴിവാക്കി.
തൊഴിലവസരങ്ങളും അടിസ്ഥാന സൗകര്യ വികസനവും
ഈ പദ്ധതി രാജ്യത്തുടനീളം വലിയൊരു സാമ്പത്തിക, തൊഴില് ആവാസവ്യവസ്ഥ സൃഷ്ടിച്ചിട്ടുണ്ട്:
പദ്ധതിയിലൂടെ ഇതുവരെ ആകെ 14.8 ജിഗാവാട്ട് പുരപ്പുറ സൗര ശേഷി പ്രവര്ത്തനക്ഷമമാക്കി.
34,219 രജിസ്റ്റര് ചെയ്ത വിതരണക്കാരില് 29,469 പേരും സജീവമായി പ്രവര്ത്തിക്കുന്നു.
കാര്യക്ഷമതാ വര്ദ്ധക പരിപാടികള് വഴി 2.32 ലക്ഷത്തിലധികം പേര്ക്ക് പരിശീലനം നല്കി.
വൈദ്യുതി വിതരണ കമ്പനികള്ക്ക് 3,807.6 കോടി രൂപയും, തദ്ദേശ സ്ഥാപനങ്ങള്ക്കായി 104 കോടി രൂപയും പ്രോത്സാഹന ധനസഹായം നല്കി. 46 നഗരങ്ങളില് ‘സിറ്റി ആക്സിലറേറ്റര് പ്രോഗ്രാം’ ആരംഭിച്ചു.
വിതരണക്കാരുടെ ഉത്തരവാദിത്തം ഉറപ്പാക്കാന് 23,000 മൂന്നാം കക്ഷി ഗുണനിലവാര പരിശോധനകള് പൂര്ത്തിയാക്കി.
സര്ക്കാര് കെട്ടിടങ്ങളുടെ സൗരോര്ജ്ജവല്ക്കരണം
പൊതുമേഖലാ കെട്ടിടങ്ങളിലും സൗരോര്ജ്ജവല്ക്കരണം വേഗത്തില് പുരോഗമിക്കുന്നു:
കേന്ദ്ര സര്ക്കാര് കെട്ടിടങ്ങള്: 1,418 മെഗാവാട്ട് ശേഷിയുള്ള 41,542 കെട്ടിടങ്ങള് കണ്ടെത്തിയതില്, 872 മെഗാവാട്ട് ശേഷിയുള്ള 25,255 കെട്ടിടങ്ങള് സൗരോര്ജ്ജവല്ക്കരിച്ചു.
സംസ്ഥാന സര്ക്കാര് കെട്ടിടങ്ങള്: 4,400 മെഗാവാട്ട് ശേഷിയുള്ള 3.20 ലക്ഷം കെട്ടിടങ്ങള് കണ്ടെത്തിയതില്, 1,450 മെഗാവാട്ട് ശേഷിയുള്ള 81,329 കെട്ടിടങ്ങളില് പാനലുകള് സ്ഥാപിച്ചു.
ആകെ 1.06 ലക്ഷം സര്ക്കാര് കെട്ടിടങ്ങള് ഇതുവരെ സോളാര് പാനലുകളിലേക്ക് മാറി.
50 ലക്ഷത്തിലധികം കുടുംബങ്ങളിലേക്ക് വെളിച്ചമെത്തിച്ച് അതിവേഗം മുന്നേറുന്ന പി.എം സൂര്യ ഘര്: മുഫ്ത് ബിജ്ലി യോജന, പൗരകേന്ദ്രീകൃതമായ ശുദ്ധ ഊര്ജ്ജ സ്വീകാര്യതയില് ഭാരതത്തെ ആഗോളതലത്തില് മുന്നിരയിലെത്തിക്കുക മാത്രമല്ല, ഓരോ കുടുംബത്തിന്റെയും ഊര്ജ്ജ സുരക്ഷയും സാമ്പത്തിക സ്വാതന്ത്ര്യവും ഉറപ്പാക്കുന്നു.
