മുംബൈ: ഇന്ത്യയിലെ ഏറ്റവും ചെലവേറിയ സിനിമ എന്ന വിശേഷണത്തിനര്‍ഹമായ 4800 കോടി രൂപയുടെ രാമായണയുടെ ട്രെയിലറിന് വാഴ്ത്തലും വിമര്‍ശനവും. രണ്‍ബീര്‍ കപൂര്‍ രാമനായും യാഷ് രാവണനായും തിളക്കമാര്‍ന്ന പ്രകടനം പുറത്തെടുക്കുന്നു. കൂടുതല്‍ കയ്യടി നേടുന്നത് യാഷിന്റെ രാവണകഥാപാത്രമാണ്.
അതേ സമയം സായി പല്ലവി സീതയെന്ന കഥാപാത്രത്തോട് നീതി പുലര്‍ത്തിയോ എന്ന വിമര്ശനം ശക്തമാണ്.
ഈ ബ്രഹ്മാണ്ഡ സിനിമയുടെ വിഎഫ്എക്സിനെക്കുറിച്ചും വിമര്‍ശനമുയരുന്നുണ്ട്. ഇക്കാര്യത്തില്‍ ഹോളിവുഡ് സിനിമയുടെ ഫോട്ടോ റിയലിസം തീരെയില്ലെന്നും പകരം ചൈനയില്‍ നിന്നും പുറത്തിറങ്ങുന്ന ചില പുരാണ സിനിമ പോലെയാണെന്നും വിമര്ശനം ഉയരുന്നുണ്ട്.
ജടായുവിന്റെ ദൃശ്യപരമ്പര, രാവണന്റെ വരവ്, പുഷ്പക വിമാനം, ഇന്ദ്രന്റെ ആനയുമായുള്ള രാവണന്റെ യുദ്ധം, രാമന്റെയും സീതയുടെയും വിവാഹം, അയോധ്യയിലെ കൊട്ടാരവും ലങ്കയിലെകൊട്ടാരവും എന്നിവ എടുത്തുനോക്കുമ്പോള്‍ എല്ലാറ്റിലും വിഎഫ് എക്സ് ഗുണനിലവാരം സുസ്ഥിരമല്ലെന്നും പലയിടത്തും പല ഗുണനിലവാരമാണ് കാണിക്കുന്നതെന്നുമാണ് വിമര്ശനം.
അതേ സമയം റഹ്മാന്‍ ഒരുക്കിയ പശ്ചാത്തലസംഗീതം പ്രശംസ പിടിച്ചുപറ്റുന്നു. കഥാപാത്രങ്ങളുടെ വേഷവിധാനങ്ങള്‍ക്കും അഭിനന്ദനങ്ങള്‍ എത്തുന്നു.
വനവും അതിനുള്ളില്‍ മൃഗങ്ങളുടെയും കാര്യത്തിലെ കമ്പ്യൂട്ടര്‍ ഗ്രാഫിക്സ് ശരാശരിയാണെന്നും പറയപ്പെടുന്നു. കുംഭകര്‍ണ്ണന്റെ വരവും വിമര്ശനം ഏറ്റുവാങ്ങുന്നു. ഒരോ ദൃശ്യത്തിലും വിഷ്വല്‍ എഫക്റ്റ് ഓരോ രീതിയിലാണെന്നും പറയുന്നു.
