ന്യൂദല്‍ഹി: എഥനോള്‍ ചേര്‍ത്ത ഇ20 പെട്രോള്‍ വിറ്റത് കാരണം പെട്രോളിന്റെ വില രാജ്യത്ത് 30 രൂപയോളം കുറയ്ക്കാന് കഴിഞ്ഞുവെന്നും അതല്ലെങ്കില്‍ വില ലിറ്ററിന് 125 ആയേനെ എന്നും കേന്ദ്രസര്‍ക്കാര്‍. രാജ്യാന്തരതലത്തില്‍ ക്രൂഡോയില്‍ വില ബാരലിന് 135 ഡോളര്‍ എന്ന നിലയിലേക്ക് വരെ ഉയര്‍ന്നിരുന്നു. അന്ന് പക്ഷെ ഇന്ത്യയില്‍ വില പിടിച്ചുനിര്‍ത്താന്‍ കഴിഞ്ഞത് എഥനോള്‍ ചേര്‍ത്ത പെട്രോള്‍ വില്‍ക്കാന്‍ കഴിഞ്ഞതിനാലാണ്. അതല്ലെങ്കില്‍ ആ സമയത്ത് വില ലിറ്ററിന് 125 രൂപ വരെയായി ഉയര്‍ന്നേനെ എന്ന് കേന്ദ്രപെട്രോളിയം മന്ത്രാലയം പറയുന്നു.
ഇ20 പെട്രോളിനെ വിമര്‍ശിച്ച് അരവിന്ദ് കെജ്രിവാളും മറ്റും രംഗത്ത് വരുന്നതിനിടെയാണ് ഇ20 പെട്രോളിനെ ന്യായീകരിച്ചുകൊണ്ടുള്ള ഈ നിലപാട്. 80 ശതമാനം പെട്രോളിനൊപ്പം 20 ശതമാനം എഥനോള്‍ കലര്‍ത്തിയിട്ടുള്ളതാണ് ഇ20 പെട്രോള്‍.
എഥനോള്‍ ഉണ്ടാക്കാന്‍ പാവപ്പെട്ടവര്‍ക്കുള്ള ഭക്ഷ്യധാന്യം ഉപയോഗിക്കുന്നു എന്ന വിമര്‍ശനത്തെയും കേന്ദ്ര സര്‍ക്കാര്‍ തള്ളി. എഥനോള്‍ പെട്രോളില്‍ കലര്‍ത്തി ഇ20 പെട്രോള്‍ ഉണ്ടാക്കുന്നത് പ്രധാനമായും എണ്ണയുടെ ഇറക്കുമതി നിയന്ത്രിക്കാനാണെന്നും കേന്ദ്ര പെട്രോളിയം വകുപ്പ് പറയുന്നു. ഇപ്പോള്‍ വില്‍ക്കുന്ന ഇ20 പെട്രോളില്‍ അഞ്ചിലൊന്ന് എഥനോളും രാജ്യത്തിനകത്ത് ഉല്‍പാദിപ്പിക്കുന്നതാണെന്നും സര്‍ക്കാര്‍ അറിയിച്ചു. .
