തിരുവനന്തപുരം: സംസ്ഥാനത്തെ ട്രഷറികളിലെത്തുന്ന അവശരായ മുതിര്ന്ന പൗരന്മാര്ക്ക് കാലതാമസം കൂടാതെ ട്രഷറി ഇടപാടുകള് പൂര്ത്തിയാക്കി നല്കാന് ബന്ധപ്പെട്ടവര്ക്ക് നിര്ദേശം നല്കണമെന്ന് മനുഷ്യാവകാശ കമ്മീഷന് ചെയര്പേഴ്സണ് ജസ്റ്റിസ് അലക്സാണ്ടര് തോമസ്. മുതിര്ന്ന പൗരന്മാരോട് മാന്യമായി പെരുമാറാന് ട്രഷറി ഉദ്യോഗസ്ഥര്ക്ക് നിര്ദേശം നല്കണമെന്നും കമ്മീഷന് തിരുവനന്തപുരം ജില്ലാ ട്രഷറി ഓഫീസര്ക്ക് നിര്ദേശം നല്കി.
2024 ആഗസ്ത് 29 ന് കുടുംബ പെന്ഷന് വാങ്ങാന് നെയ്യാറ്റിന്കര പെന്ഷന് പേമെന്റ് സബ്ട്രഷറിയിലെത്തിയ രോഗിയായ അമ്മയെ മാനസികമായും ശാരീരികമായും ബുദ്ധിമുട്ടിച്ചെന്ന മകളുടെ പരാതിയിലാണ് നടപടി. നട്ടെല്ലിന് ശസ്തക്രിയ നടന്നതിനാല് വേദന കൊണ്ട് പുളയുകയായിരുന്ന അമ്മയെ ക്യാഷ് കൗണ്ടറിലെത്തിക്കാന് ഉദ്യോഗസ്ഥന് നിര്ബന്ധിച്ചതായി പരാതിയില് പറഞ്ഞു. പരാതിയുമായി മുന്നോട്ടുപോകാന് താത്പര്യമില്ലെന്നും ട്രഷറിയിലെത്തുന്ന അവശരായ മുതിര്ന്ന പൗരന്മാര്ക്ക് പരിഗണന നല്കാന് നടപടി സ്വീകരിച്ചാല് മതിയെന്നും പരാതിക്കാരി അറിയിച്ചതായി ജില്ലാ ട്രഷറി ഓഫീസര് കമ്മീഷനെ അറിയിച്ചു. പള്ളിച്ചല് ഗുരുദേവ് നഗര് സ്വദേശിനി എസ്.കെ. സീമ സമര്പ്പിച്ച പരാതിയിലാണ് നടപടി.
