തിരുവനന്തപുരം: ‘കള്ളന്‍ വിജയന്‍’ ലേഖന വിവാദത്തിന്റെ പശ്ചാത്തലത്തില്‍ ദേശാഭിമാനി വാരാന്തപ്പതിപ്പ് എഡിറ്റര്‍ കെ.ആര്‍.അജയന്‍ രാജിവയ്ക്കുയോ അവധിയില്‍ പോവുകയോ ചെയ്യണമെന്ന് ചീഫ് എഡിറ്റര്‍ നിര്‍ദേശം നല്‍കി. വിവാദത്തിന് പിന്നാലെ അജയനെ വാരാന്തപ്പതിപ്പ് എഡിറ്റര്‍ സ്ഥാനത്ത് നിന്ന് ഒഴിവാക്കിയിരുന്നു.
എന്നാല്‍ രേഖാമൂലം അറിയിപ്പൊന്നും ലഭിച്ചിട്ടില്ലെന്ന് കെ ആര്‍ അജയന്‍ പ്രതികരിച്ചു.അതേസമയം വിഷയത്തില്‍ പ്രതികരിക്കാന്‍ ചീഫ് എഡിറ്റര്‍ പുത്തലത്ത് ദിനേശന്‍ തയാറായില്ല.
വി എസ് അച്യുതാനന്ദന്റെ ഒന്നാം ചരമ വാര്‍ഷികത്തോടനുബന്ധിച്ച് അനുസ്മരണ ലേഖനങ്ങളുള്ള വാരാന്തപ്പതിപ്പിന്റെ അവസാന പേജില്‍ ‘കള്ളന്‍ വിജയന്‍ ‘ എന്ന തലക്കെട്ടില്‍ നാടക പ്രവര്‍ത്തകനെകുറിച്ചുള്ള ലേഖനം വന്നെങ്കിലും അതൊഴിവാക്കി വാരാന്തപ്പതിപ്പ് പുറത്തിറക്കി. പിന്നാലെ വാരാന്തപ്പതിപ്പിന്റെ ചുമതലയുളള ന്യൂസ് എഡിറ്റര്‍ കെ.ആര്‍.അജയനോട് ദേശാഭിമാനി വിശദീകരണം തേടി.’കള്ളന്‍ വിജയന്‍’ എന്ന ലേഖനത്തില്‍ പാര്‍ട്ടി വിരുദ്ധതയില്ലെന്നും,അനുയോജ്യമായ തലക്കെട്ട് എന്നുമായിരുന്നു കെ ആര്‍ അജയന്‍ മറുപടി നല്‍കിയത്.ഇത് തള്ളിയാണ് വാരാന്തപ്പതിപ്പ് ചുമതലയില്‍ നിന്നും കെ.ആര്‍ അജയനെ മാറ്റിയത്. ടി ചന്ദ്ര മോഹനാണ് പകരം ചുമതല നല്‍കിയത്.
തിരുവനന്തപുരം മുത്തിപ്പാറ സ്വദേശി നാടക പ്രവര്‍ത്തകന്‍ വിജയന്റെ ജീവിതമാണ് ലേഖനം. കള്ളന്‍ വിജയന്‍ ധന്യ നാടക ഗ്രാമം മുത്തിപ്പാറ പി ഒ എന്ന പേരിലാണ് ലേഖനം പ്രസിദ്ധീകരിച്ചത്. ദേശാഭിമാനി വാരാന്ത പതിപ്പില്‍ ലേഖനം പ്രസിദ്ധീകരിക്കാത്തത് വിവാദമായിരുന്നു.ഈ മാസം 19ലെ ദേശാഭിമാനി വാരാന്തപ്പതിപ്പാണ് അവസാന നിമിഷം വിതരണം ചെയ്യാതെ തടഞ്ഞുവെച്ചത്.
ഒന്നാം പേജില്‍ വി.എസ്. അനുസ്മരണവും അവസാന പേജില്‍ ‘കള്ളന്‍ വിജയന്‍’ എന്ന തലക്കെട്ടും വരുന്നത് രാഷ്‌ട്രീയ എതിരാളികളും ട്രോളന്മാരും ദുര്‍വ്യാഖ്യാനം ചെയ്യാന്‍ ഇടയാക്കുമെന്ന എഡിറ്റോറിയല്‍ ബോര്‍ഡിന്റെ ആശങ്കയായിരുന്നു പത്രം വിതരണം ചെയ്യാത്തതിന് പിന്നില്‍. 20 ന് വാരാന്തപതിപ്പ് പ്രസിദ്ധീകരിച്ചെങ്കിലും പത്രത്തില്‍ നിന്ന് ഈ ലേഖനം ഒഴിവാക്കി.
