തിരുവനന്തപുരം:ദേശാഭിമാനി വാരാന്ത്യപ്പതിപ്പില് ‘കള്ളന് വിജയന്’ എന്ന തലക്കെട്ടില് ലേഖനം ഉള്പ്പെട്ട വിവാദത്തില് കാരണം കാണിക്കല് നോട്ടീസിന് മറുപടി നല്കി വരാന്ത്യപ്പതിപ്പ് എഡിറ്റര് കെ ആര് അജയന്.കള്ളന് വിജയന് ലേഖനത്തില് പാര്ട്ടി വിരുദ്ധതയില്ലെന്നും അനുയോജ്യമായ തലക്കെട്ട് ആണ് നല്കിയതെന്നും തെറ്റുണ്ടെങ്കില് തിരുത്താമെന്നും കെ ആര് അജയന് മറുപടി നല്കി. ഇന്ന് നാല് മണിക്ക് മുമ്പ് വിശദീകരണം നല്കണമെന്നാണ് കാരണം കാണിക്കല് നോട്ടീസില് ആവശ്യപ്പെട്ടിരുന്നത്. ലേഖനവുമായി ബന്ധപ്പെട്ട് അനാവശ്യ വിവാദം ഉണ്ടാക്കി എന്നാണ് കുറ്റം.
വിവാദ ലേഖനത്തിന് ‘കള്ളന് വിജയന്’ എന്ന തലക്കെട്ട് മാറ്റാന് ആവശ്യപ്പെട്ടിട്ടും തയാറായില്ലെന്ന വിമര്ശനവുമുണ്ട്. വിവാദം മാധ്യമങ്ങളെ അറിയിച്ചെന്നും കാരണം കാണിക്കല് നോട്ടീസില് കുറ്റപ്പെടുത്തുന്നു.വിഎസ് അച്യുതാനന്ദനെ കുറിട്ടുളള അനുസ്മരണം ഉള്പ്പെടുന്ന വാരാന്ത്യപ്പതിപ്പില് കള്ളന് വിജയന് എന്ന തലക്കെട്ടിലുള്ള ലേഖനവും ഇടംനേടിയതാണ് വിവാദമായത്.
തലക്കെട്ട് സംബന്ധിച്ച് ദേശാഭിമാനിയില് അഭിപ്രായ ഭിന്നത രൂപപ്പെട്ടതിനാല് വാരാന്ത്യപ്പതിപ്പ് വിതരണം ചെയ്യുന്നത് തിങ്കളാഴ്ചത്തേയ്ക്ക് മാറ്റിയിരുന്നു. സാങ്കേതിക കാരണങ്ങളാലാണ് ഇതെന്നാണ് റസിഡന്റ് എഡിറ്റര് എം സ്വരാജ് വിശദീകരിച്ചത്.
ലേഖകന് എഴുതി നല്കിയ കള്ളന് വിജയന് എന്ന പേരിലുള്ള ലേഖനം, തലക്കെട്ട് മാറ്റാതെ അച്ചടിക്കാനായി പ്രസിലേക്ക് വിട്ടു. ദേശാഭിമാനിയിലെ തര്ക്കം പുറത്തറിയിച്ച് വിവാദമാക്കി എന്നീ കാര്യങ്ങളാണ് കാരണം കാണിക്കല് നോട്ടീസില് അജയനെതിരെ ആരോപണം. തിങ്കളാഴ്ച പുറത്തിറങ്ങിയ വിഎസിനെ കുറിച്ചുളള അനുസ്മരണം ഉള്പ്പെട്ട വാരാന്ത്യപ്പതിപ്പില് നിന്നും ‘കള്ളന് വിജയന്’ ലേഖനം മാറ്റിയിരുന്നു.
