തിരുവനന്തപുരം: ഡ്രൈവിംഗ് സ്കൂള് ഉടമകളും ഇന്സ്ട്രക്ടര്മാരും ഇടനിലക്കാരും മറ്റു ജീവനക്കാരും അടക്കം ആരെയും ഡ്രൈവിംഗ് ടെസ്റ്റ് നടക്കുന്നിടത്തേയ്ക്ക് പ്രവേശിപ്പിക്കരുതെന്ന് നിര്ദേശിച്ച് ഗതാഗത കമ്മീഷണറുടെ സര്ക്കുലര്.
മോട്ടോര് വാഹന വകുപ്പിലെ അഴിമതി തടയാനുള്ള നടപടികളുടെ ഭാഗമായാണ് പുതിയ സര്ക്കുലര് പുറപ്പെടുവിച്ചിരിക്കുന്നത്.
ഡ്രൈവിംഗ് ടെസ്റ്റുകളില് അനധികൃത ഇടപെടലുകള് ഒഴിവാക്കണം. നിശ്ചയിച്ചിട്ടുള്ള സ്ഥലത്ത് ഉദ്യോഗസ്ഥരും അപേക്ഷകരും മാത്രമേ പാടുള്ളൂ. ജീവനക്കാരടക്കം മാറ്റാരേയും പ്രവേശിപ്പിക്കരുത്. അപേക്ഷകര്ക്കായി അനുവദിച്ച സ്ഥലത്തിന് പുറത്തേ മറ്റുള്ളവര് നില്ക്കാവൂ. ഫീല്ഡ് ഡ്യൂട്ടിക്ക് മുമ്പ് ഉദ്യോഗസ്ഥര് കൈവശമുള്ള പണത്തിന്റെ വിവരം ടെസ്റ്റ് ഷീറ്റിലോ പ്രൈവറ്റ് ക്യാഷ് ഡിക്ലറേഷന് രജിസ്റ്ററിലോ രേഖപ്പെടുത്തണം. ടെസ്റ്റ് കേന്ദ്രങ്ങളിലും മറ്റ് ഫീല്ഡ് ഡ്യൂട്ടിയിടങ്ങളിലും ആര്ടിഒമാര് മിന്നല് പരിശോധന നടത്തണം. ഏതെങ്കിലും തരത്തിലുള്ള വീഴ്ച കണ്ടെത്തിയാല് ഉടന് ഗതാഗത കമ്മീഷണറെ അറിയിക്കണം.
ഫീല്ഡ് ഡ്യൂട്ടിയിലെ അനുചിതമായ പെരുമാറ്റങ്ങള്, ഔദ്യോഗിക നടപടിക്രമങ്ങള് പാലിക്കാതിരിക്കല്, ഡ്രൈവിംഗ് ടെസ്റ്റുകളിലെ അനധികൃത ഇടപെടല്, സേവനത്തിലെ സുതാര്യതയില്ലായ്മ തുടങ്ങിയ പരാതികള് വ്യാപകമായ സാഹചര്യത്തിലാണ് പുതിയ സര്ക്കുലര് പുറത്തിറക്കിയത്.
