കേരളത്തിലെ ലക്ഷക്കണക്കിന് ഉദ്യോഗാര്ത്ഥികളുടെ ഭാവി അനിശ്ചിതത്വത്തിലാക്കിക്കൊണ്ട് പബ്ലിക് സര്വീസ് കമ്മിഷന് മുന്പെങ്ങുമില്ലാത്തവിധം വലിയൊരു ഭരണപ്രതിസന്ധിയെയും റിക്രൂട്ട്മെന്റ് തകര്ച്ചയെയുമാണ് അഭിമുഖീകരിക്കുന്നത്. വന് ക്രമക്കേടുകള്, പരീക്ഷാ തട്ടിപ്പുകള്, സര്ക്കാര് വകുപ്പുകളിലെ ഒഴിവുകള് മറച്ചുവെക്കല് എന്നിവ കാരണം സംസ്ഥാനത്തെ തൊഴില് രംഗം സ്തംഭിച്ച അവസ്ഥയിലാണ്.
രാപ്പകലില്ലാതെ അധ്വാനിച്ച് മത്സരപരീക്ഷകള് പാസ്സായി റാങ്ക് ലിസ്റ്റില് ഇടംപിടിച്ചിട്ടും നിയമനം ലഭിക്കാത്തതില് പ്രതിഷേധിച്ച് കേരളത്തിലെ ഉദ്യോഗാര്ത്ഥികള് ശക്തമായ പ്രക്ഷോഭപാതയിലാണ്. തിരുവനന്തപുരത്തെ സെക്രട്ടറിയേറ്റിന് മുന്നിലും കോഴിക്കോട്, കൊച്ചി, കൊല്ലം, പാലക്കാട് തുടങ്ങിയ ജില്ലകളിലും പിഎസ്സി റാങ്ക് ഹോള്ഡര്മാര് പ്രതിഷേധത്തിലാണ്. എന്നാല് ഇതൊന്നും അധികാരികള് കണ്ട മട്ടില്ല.
ഭരണമാറ്റത്തിലും തുടരുന്ന തട്ടിപ്പുകളും മൂല്യനിര്ണ്ണയ വീഴ്ചകളും
മുന് എല്ഡിഎഫ് സര്ക്കാരിന്റെ കാലത്ത് ഉയര്ന്നുവന്ന അതേ റിക്രൂട്ട്മെന്റ് പ്രശ്നങ്ങളും ചോദ്യപേപ്പര് ചോര്ച്ചയും നിലവിലെ മുഖ്യമന്ത്രി വി.ഡി. സതീശന്റെ നേതൃത്വത്തിലുള്ള സര്ക്കാരിന് കീഴിലും മാറ്റമില്ലാതെ തുടരുകയാണ്. ഇതിന് പുറമെ, പിഎസ്സി നടത്തുന്ന പരീക്ഷകളുടെ സുതാര്യതയെപ്പോലും ചോദ്യം ചെയ്യുന്ന ഗുരുതരമായ വീഴ്ചകളാണ് അടുത്തിടെ റിപ്പോര്ട്ട് ചെയ്തത്. സംസ്ഥാന ആസൂത്രണ ബോര്ഡിലെ മൂന്ന് സീനിയര് തസ്തികകളിലേക്ക് നടത്തിയ പരീക്ഷയില് 10 ചോദ്യങ്ങള് മൂല്യനിര്ണ്ണയം നടത്താതെ ഫലം പ്രഖ്യാപിച്ചത് അര്ഹരായവര്ക്ക് അവസരം നഷ്ടപ്പെടുന്നതിന് കാരണമായി.
സ്വകാര്യ കോച്ചിങ് സെന്ററുകളുടെ സ്റ്റഡി മെറ്റീരിയലുകളില് നിന്ന് അതേപടി ചോദ്യപേപ്പറുകള് പകര്ത്തി നിര്മ്മിക്കുക, ഉത്തരസൂചിക ചോര്ത്തുക, പരീക്ഷാ കേന്ദ്രങ്ങള് അനുവദിക്കുന്നതിലെ വീഴ്ചകള് എന്നിവ കാരണം പരീക്ഷകളുടെ നിലവാരം പാടേ തകര്ന്നു. കൂടാതെ, സ്വാധീനമുള്ള ഉദ്യോഗാര്ത്ഥികള് സ്മാര്ട്ട് വാച്ചുകളും ബ്ലൂടൂത്ത് ഉപകരണങ്ങളും പുറത്തുനിന്നുള്ള സഹായങ്ങളും ഉപയോഗിച്ച് ഉയര്ന്ന റാങ്കുകള് സ്വന്തമാക്കുന്ന ഹൈടെക് തട്ടിപ്പുകള്ക്കും കേരളം സാക്ഷ്യം വഹിച്ചിരുന്നു. തിരുവനന്തപുരം യൂണിവേഴ്സിറ്റി കോളേജിലുണ്ടായ സംഘര്ഷത്തില് വിദ്യാര്ത്ഥിയെ കുത്തിപ്പരിക്കേല്പ്പിച്ച പ്രതി വരെ പിഎസ്സി നടത്തിയ പോലീസ് ഓഫീസര് പരീക്ഷയില് ഒന്നാം റാങ്കുകാരനായിരുന്നു. കേസിലെ രണ്ടാം പ്രതിയും റാങ്ക് ലിസ്റ്റില് ഇടം പിടിച്ചിരുന്നു. എന്നാല് പരീക്ഷാ തിരിമറിയും കോപ്പിയടിയുമാണ് റാങ്ക് നേടാന് കാരണമെന്ന് പിന്നീട് കണ്ടെത്തി.
ഒഴിവുകള് മറച്ചുവെക്കലും കാലാവധി കഴിയുന്ന റാങ്ക് ലിസ്റ്റുകളും പാര്ട്ടി അനുഭാവികളെയും താത്കാലിക ജീവനക്കാരെയും പിന്വാതിലിലൂടെ നിയമിക്കുന്നതിന് വേണ്ടി കേരളത്തിലെ വിവിധ സര്ക്കാര് വകുപ്പ് മേധാവികള് സ്ഥിരം ജോലി ഒഴിവുകള് പിഎസ്സിക്ക് റിപ്പോര്ട്ട് ചെയ്യാതെ ബോധപൂര്വ്വം മറച്ചുവെക്കുകയാണ്. വകുപ്പുകളുടെ ഈ ബോധപൂര്വ്വമായ വീഴ്ച കാരണം ആയിരക്കണക്കിന് യോഗ്യരായ ഉദ്യോഗാര്ത്ഥികള് ഉള്പ്പെട്ട സാധുവായ പിഎസ്സി റാങ്ക് ലിസ്റ്റുകളുടെ കാലാവധി നിയമനം നടക്കാതെ അവസാനിക്കുന്നു. ഇത് മൂലം പ്രായപരിധി കവിയുന്നതിനാല് ജീവിതത്തില് ഇനി ഒരിക്കലും സര്ക്കാര് ജോലി നേടാനാകാത്ത അവസ്ഥയിലാണ് ചെറുപ്പക്കാരായ ഉദ്യോഗാര്ത്ഥികള്.
തെരുവില് കണ്ണീരണിഞ്ഞ് സമരം
തങ്ങളുടെ ജീവിതവും ഭാവിയും തകര്ന്നതിലുള്ള കടുത്ത നിരാശയില് തികച്ചും വൈകാരികമായ സമരമാര്ഗ്ഗങ്ങളാണ് ഉദ്യോഗാര്ത്ഥികള് സ്വീകരിക്കുന്നത്.
തല മുണ്ഡനം ചെയ്തും മുടി മുറിച്ചുമാറ്റിയും അവര് പ്രതിഷേധിച്ചു. അധികാരികള് കണ്ണ് തുറക്കാതായതോടെ ഉദ്യോഗാര്ത്ഥികള് പൊരിവെയിലില് മുട്ടിലിഴഞ്ഞും, ശയന പ്രദക്ഷിണം നടത്തിയും ഭരണാധികാരികളുടെ കനിവ് തേടി. തെരുവില് പിച്ചച്ചട്ടിയേന്തി ഭിക്ഷയാചിച്ചും, മണ്ണു തിന്നും അവര് പ്രതീകാത്മകമായി പ്രതിഷേധിച്ചു.
സര്ക്കാരിന്റെ അവഗണനയും ഭരണാധികാരികളുടെ ഇരട്ടത്താപ്പും
സമരക്കാരുടെ ന്യായമായ ആവശ്യങ്ങള് കേള്ക്കാനോ അവരുമായി ചര്ച്ച നടത്താനോ തയ്യാറാകാതെ കടുത്ത പോലീസ് നടപടികളിലൂടെ സമരത്തെ അടിച്ചമര്ത്താനാണ് സര്ക്കാര് ശ്രമിക്കുന്നത്. ഉദ്യോഗാര്ത്ഥികളുടെ പ്രതിനിധികളുമായി ചര്ച്ച നടത്താനോ പ്രശ്നപരിഹാരത്തിന് ശ്രമിക്കാനോ മുഖ്യമന്ത്രി വി.ഡി. സതീശനോ അദ്ദേഹത്തിന്റെ മന്ത്രിസഭയോ തയ്യാറായിട്ടില്ല.
നീറ്റ് പരീക്ഷാ പേപ്പര് ചോര്ച്ചയ്ക്കെതിരെ പ്രതിഷേധിക്കാന് ന്യൂദല്ഹി വരെ യാത്ര ചെയ്ത മുഖ്യമന്ത്രി വി.ഡി. സതീശന്, സ്വന്തം ഓഫീസിന് വെളിയില് സമരം ചെയ്യുന്ന ഉദ്യോഗാര്ത്ഥികളെ തിരിഞ്ഞുനോക്കാത്തത് യുഡിഎഫ് സര്ക്കാരിന്റെ ഇരട്ടത്താപ്പാണ് വ്യക്തമാക്കുന്നത്.
പരീക്ഷാ തട്ടിപ്പുമായി ബന്ധപ്പെട്ട ആരോപണത്തില് ഇപ്പോള് നടക്കുന്ന ക്രൈം ബ്രാഞ്ച് അന്വേഷണം പോലും പ്രഹസനമാകുമോ എന്ന ആശങ്കയും ഉദ്യോഗാര്ത്ഥികള്ക്കുണ്ട്.
ഉദ്യോഗാര്ത്ഥികളുടെ പ്രധാന ആവശ്യങ്ങള്
എല്ലാ പിഎസ്സി പരീക്ഷാ വീഴ്ചകളെക്കുറിച്ചും ക്രമക്കേടുകളെക്കുറിച്ചും ഉന്നതതല ജുഡീഷ്യല് അല്ലെങ്കില് ക്രൈംബ്രാഞ്ച് അന്വേഷണം പ്രഖ്യാപിക്കുക.
വിവിധ വകുപ്പുകള് തടഞ്ഞുവെച്ചിരിക്കുന്ന മുഴുവന് ഒഴിവുകളും കൃത്യസമയത്ത് നിര്ബന്ധമായും പിഎസ്സിക്ക് റിപ്പോര്ട്ട് ചെയ്യുക.
പിന്വാതിലിലൂടെ നിയമിക്കപ്പെട്ട മുഴുവന് താത്കാലിക/കരാര് ജീവനക്കാരെയും ഉടനടി പിരിച്ചുവിടുക.
ക്രമക്കേടുകള് മൂലം ബാധിക്കപ്പെട്ട നിലവിലുള്ള എല്ലാ പിഎസ്സി റാങ്ക് ലിസ്റ്റുകളുടെയും കാലാവധി ഔദ്യോഗികമായി നീട്ടിനല്കുക.
ജന്മഭൂമി ഓണ്ലൈന്