കൊച്ചി: കേരള സ്റ്റേറ്റ് കാഷ്യൂ ഡെവലപ്മെന്റ് കോര്പറേഷനുമായി ബന്ധപ്പെട്ട അഴിമതിക്കേസിലെ പ്രതിയായ കെ.എ. രതീഷ് സംസ്ഥാന സര്ക്കാരിന് കീഴില് ഏതെങ്കിലും പ്രധാന പദവിയില് തുടരുന്നുണ്ടോ എന്ന് അറിയിക്കാന് ഹൈക്കോടതി സര്ക്കാരിനോട് നിര്ദേശിച്ചു. സംസ്ഥാന സര്ക്കാരിന് കീഴിലുള്ള മൂന്ന് പ്രധാന പദവികളില് രതീഷ് തുടരുന്നതിനെതിരെയുള്ള ഹര്ജിയാണ് ജസ്റ്റിസ് എ. ബദറുദ്ദീന് അധ്യക്ഷനായ ബെഞ്ച് പരിഗണിച്ചത്.
അഴിമതിക്കേസില് ക്രിമിനല് നടപടികള് നേരിടുമ്പോഴും കേരള ഖാദി ആന്ഡ് വില്ലേജ് ഇന്ഡസ്ട്രീസ് ബോര്ഡ് സെക്രട്ടറി, റുട്രോണിക്സ് (കേരള സ്റ്റേറ്റ് റൂറല് വിമന്സ് ഇലക്ട്രോണിക്സ് ഇന്ഡസ്ട്രിയല് കോ-ഓപ്പറേറ്റീവ് ഫെഡറേഷന് ലിമിറ്റഡ്) മാനേജിങ് ഡയറക്ടര്, കേരള ഖാദി വര്ക്കേഴ്സ് വെല്ഫെയര് ഫണ്ട് ബോര്ഡ് ചീഫ് എക്സിക്യൂട്ടീവ് ഓഫീസര് എന്നീ പ്രധാന പദവികളില് രതീഷ് തുടരുന്നുണ്ടെന്ന് ഹര്ജിക്കാരനായ ഷാജഹാന് വാദിച്ചു. ഇതില് രണ്ട് സ്ഥാപനങ്ങളിലും മുഖ്യമന്ത്രിയാണ് ചെയര്മാന് എന്നും, രതീഷ് നേരിട്ട് അദ്ദേഹത്തിനാണ് റിപ്പോര്ട്ട് ചെയ്യുന്നതെന്നും ഹര്ജിയില് ചൂണ്ടിക്കാട്ടി.
കോര്പറേഷന് മാനേജിങ് ഡയറക്ടറായിരുന്ന കാലയളവില് ഏകദേശം 600 കോടി രൂപയുടെ കശുവണ്ടി ഇറക്കുമതിയിലും വാങ്ങലിലും വ്യാപക ക്രമക്കേട് നടത്തിയെന്നാരോപിച്ചുള്ള അഴിമതിക്കേസില് ഒന്നാം പ്രതിയായായ രതീഷ് പ്രധാന പദവികളില് തുടരുന്നതിനെതിരെ വിജിലന്സ് വിഭാഗത്തിനും സിബിഐ കൊച്ചി യൂണിറ്റ് സൂപ്രണ്ട് ഓഫ് പോലീസിനും പരാതി നല്കിയിട്ടും നടപടിയുണ്ടായില്ലെന്നും ഹര്ജിയില് പറയുന്നു.
രതീഷും സിബിഐയും ഉള്പ്പെടെയുള്ള കക്ഷികള്ക്ക് കോടതി നോട്ടീസ് അയച്ചു. ആഗസ്ത് എട്ടിന് കേസ് വീണ്ടും പരിഗണിക്കും.
